-लिना थापा
धरानः उमेर जम्मा २२ वर्ष तर यो सहरमा यो नाम अहिले एउटा मात्र परिचयले चिनिँदैन । कर्पोरेट कार्यालयको जिम्मेवारी बोकेको हात, आफ्नै व्यवसायको जोखिम मोल्ने साहस, रोबोटिक्सको जटिल संसारमा रमाउने दिमाग, संगीतको सुरमा बग्ने मन, क्यामेराको लेन्सबाट संसार हेर्ने आँखा र समाजसेवाको भावनाले धड्किने हृदय । यी सबै एकैसाथ बोकेर विराटनगरका अनुभव बस्नेत हिँडिरहेका छन् ।
प्रविधिमा आधारित भेन्डिङ व्यवसायको सम्भावना कसैको नजरमा परेकै थिएन । त्यही मौनतालाई अनुभवले अवसरमा फेरे र जन्माए एबी भेन्डोरर्स । जसलाई अहिले मानिसहरू ‘भेन्डिङ किङ विराटनगर’ भनेर चिन्छन् । आज उनका तीनदेखि चार वटा स्मार्ट भेन्डिङ मेसिन चलिरहेका छन्, र हरेक मेसिनले औसतमा मासिक करिब डेढ लाख रुपैयाँसम्मको बिक्री गरिरहेको छ ।
यो सपना विराटनगरको सीमानामै अडिएन । यात्रा विराटनगर विमानस्थलसम्म पुग्यो, जहाँ हतारमा हुने यात्रुहरूले आवश्यक सामग्री सहजै किन्न पाउँछन् । अनुभवको एउटै सिद्धान्तले यो व्यवसायलाई भीडभन्दा अलग उभ्यायो–मेसिनमा राखिने हरेक सामान एमआरपीमै बेच्ने । सार्वजनिक स्थानमा सामान महङ्गो पर्छ भन्ने गुनासो चिरेर उनले ग्राहकको भरोसा जितेका छन् । उनका लागि भेन्डिङ मेसिन केवल सामान बेच्ने यन्त्र मात्र होइन, यो त प्रविधि र दैनिक जीवनलाई गाँस्ने नयाँ खालको रिटेल अवधारणा हो । यसैलाई अझ पर पुरयाउँदै उनले नेपालमै निर्मित मेड इन नेपाल स्मार्ट भेन्डिङ मेसिनको पहल पनि थालेका छन् ।
व्यवसायको यो यात्रासँगै अनुभवको अर्को अनुहार कर्पोरेट क्षेत्रमा पनि उत्तिकै झल्किन्छ । उनी विराट नर्सिङ होम, विराट मेडिकल कलेजमा पनि कार्यरत छन्, साथै संस्थाको डिजिटल उपस्थिति गढ्ने जिम्मेवारीमा कन्टेन्ट क्रियटरको भूमिकामा पनि सक्रिय छन् । प्रविधिप्रतिको यही तिर्खाले उनलाई रोबोटिक्सको संसारसम्म तानेर लग्यो । उनी टिम डिस्टिब्युटर्सका संस्थापक हुन्, जसले राष्ट्रिय र अन्तर्राष्ट्रियस्तरका रोबोवारर्स र रोबोसोसियर प्रतियोगितामा भाग लिँदै आएका छन् ।
दिनभरिको हतारपछि साँझ ढल्दा अनुभव फेरि नयाँ रूपमा जीवित हुन्छन्— विराटनगरका विभिन्न क्लब र लाउन्जमा लाइभ कन्सर्टमा पनि भूमिका निभाउँछन् । विभिन्न कार्यक्रमहरूमा फ्रिलेन्स इभेन्ट होस्टको भूमिकामा पनि उनी उत्तिकै सहज देखिन्छन् । समाजसेवाको धर्तीमा पनि उनको खुट्टा उत्तिकै बलियो गाडिएको छ— हाल उनी रोट्याक्ट क्लब अफ विराटनगरको भाइस प्रेसिडेन्ट भएर सामाजिक सेवाका विभिन्न कार्यक्रममा नेतृत्व गरिरहेका छन् ।
अनुभवको सम्बन्ध क्यामेरा र आकाशसँग पनि उत्तिकै गहिरो छ । ड्रोन पाइलट, भिज्युल स्टोरी टेलरका रूपमा उनी स्थानीय तथा राष्ट्रिय ब्रान्डहरूसँग सहकार्य गर्दै काम गर्छन् । यात्रा उनको मनपर्ने अर्को भूमि हो — नेपालका कुनाकुनामा पुगेर त्यहाँको प्राकृतिक सौन्दर्य, संस्कृति र यात्रा–अनुभवलाई भिडियो र डिजिटल कन्टेन्टको माध्यमबाट उनी संसारसामु ल्याइरहेका छन् ।
डिजिटल क्षेत्रमा हिँड्दै जाँदा उनले एउटा रित्तोपन महसुस गरे– पूर्वी नेपालका कन्टेन्ट क्रियटरर्सबीच सम्पर्क र सहकार्यको वातावरणको अभाव । यही रित्तोपनलाई पूर्ति गर्न उनले सुरु गरे । जसले विराटनगर र पूर्वी नेपालका डिजिटल प्रतिभाहरूलाई नेटवर्किङ र क्लोलाब्रेसन अनुभव आदानप्रदानको साझा मञ्च दिइरहेको छ ।
२२ वर्षको उमेरमा यति धेरै क्षेत्रमा एकसाथ हिँड्नु सजिलो कुरा होइन । यसका लागि समय व्यवस्थापन, अनुशासन र निरन्तर सिकाइ अपरिहार्य हुन्छ भन्नेमा अनुभव स्पष्ट छन् । उनी मान्छन्, ‘आजको युवाले आफ्नो सम्भावनालाई एउटै करियरमा साँघुरो पार्नु आवश्यक छैन ।’
उनको यात्रा कुनै एक व्यवसाय वा पेशाको कथा मात्र होइन, यो त एउटा प्रमाण हो– कसरी आजको पुस्ताले आफ्नो रुचि र क्षमतालाई विभिन्न क्षेत्रमा फैलाएर नयाँ सम्भावनाहरू सिर्जना गर्न सक्छ भन्ने । कर्पोरेट कार्यालय, आफ्नै व्यवसाय, रोबोटिक्स ल्याब, संगीतको मञ्च, क्यामेराको लेन्स र सामाजिक सेवा, यी सबैबीच दौडिरहेको अनुभवको यो यात्रा अझै सुरुवाती चरणमै छ । यी फरक–फरक बाटाहरूले उनलाई आगामी दिनमा कहाँ पुरयाउँछन्, त्यो हेर्न बाँकी नै छ । तर एउटा कुरा भने ढुक्कसाथ भन्न सकिन्छ– अनुभव बस्नेत आफूलाई एउटै परिचयमा सीमित राख्न कहिल्यै तयार छैनन् ।