धरानः ताप्लेजुङको दोस्रो ठूलो व्यापारिक केन्द्र दोभान बजारमा बिहीबार दिउँसो भएको आगलागीबाट १० घर पूर्ण रूपमा जलेर नष्ट भएका छन् ।
आठ जनाका १० घर जल्दा १७ परिवार विस्थापित भएका छन्। आगलागीबाट घरधनी ८ र पसल, होटल तथा डेरा गरी बस्ने ९ गरी १७ परिवार विस्थापित भएका हुन् ।
आगलागीबाट लाक्पाचुङ शेर्पा (डण्डु) र भीम लङ्वाका दुई/दुईवटा घर जलेका छन् । चन्द्रप्रसाद पौडेल, याम आङवुहाङ, घनश्याम खरेल, राजु शेर्पा र राजेन्द्र पौडेलका एकएक वटा घर जलेको छ ।
आगलागीमा परेकाले केही पनि सामान निकाल्न नपाएको बताएका छन् । विस्थापितको ब्यवस्थापनकालागि गाउँपालिका र संघसंस्थाको सहयोगमा तत्कालीन र दिर्घकालीन काम बढाइने जिल्ला विपद् व्यवस्थापन समिति अध्यक्ष एवम् प्रमुख जिल्ला अधिकारी उमेशकुमार दाहालले बताए । बजारमा २०७७ फागुन १८ गते पनि भीषण आगलागी हुँदा ४० वटा घर जलेर खरानी भएका थिए।
दोभान ताप्लेजुङको तेह्रथुम सिमानामा रहेको चल्तीको बजार हो । यही बजार हुँदै ७३.५ मेगावाट क्षमताको मध्य मेवा जलविद्युत आयोजना क्षेत्र समेत रहेको प्रदेश १ को चर्चित फुङफुङे (फङफङदेन) झरना पुगिन्छ । मदन भन्डारीको जन्मस्थान ढुङ्गेसाघु क्षेत्र जाने ताप्लेजुङको सडक ट्रान्जिट पनि दोभान बजार नै हो ।