धरानः मोरङको विराटनगरस्थित कारागारमा भेटघाटका लागि आएका दुई महिलाबाट ४८० थान लागूऔषध बरामद भएको छ । बुधबार विराटनगर महानगरपालिका–८ हाटखोलास्थित कारागार कार्यालयको मुख्य प्रवेशद्वारमा नियमित जाँच गर्ने क्रममा उनीहरूबाट लागूऔषध बरामद भएको हो ।
धरान उपमहानगरपालिका–११ बस्ने मेलिना तामाङ र पूर्णिमा तामाङले भित्री बस्त्रमा प्रयोग हुने प्याडभित्र लुकाएर ल्याएको अवस्थामा हरियो रङका २४० थान र सुन्तला रङका २४० थान ट्याब्लेट फेला परेको प्रहरीले जनाएको छ । सशस्त्र प्रहरी बल मोरङका प्रमुख एसपी गेहेन्द्रबहादुर भण्डारीका अनुसार उनीहरू दुवै दिदीबहिनी हुन् । ‘नियमित चेकजाँच गर्दा शंकास्पद देखिएपछि जाँच हुँदा लागूऔषध भेटियो,’ उनले भने, ‘ट्याब्लेट र  क्याप्सुललाई लगाएको प्याडमा लुकाएर भित्र लैजान खोजेको देखियो ।’
बरामद लागूऔषधसहित दुवै महिलालाई आवश्यक अनुसन्धान तथा कारबाहीका लागि दिउँसो १२ः ५० बजे कारागारमा खटिएको नेपाल प्रहरीको टोलीलाई बुझाइएको छ ।
बरामद ट्याब्लेट कुन प्रकारको लागूऔषध हो भन्नेबारे भने विवरण खुलाइएको छैन ।