धरानः धरानलगायत सुनसरीभर खसी-बोकाको मासुुको मूल्य तोकिएको छ ।
जिल्ला प्रशासन कार्यालय सुनसरीले खसी-बोकाको मासुको खुद्रा मूल्य प्रतिकेजी अधिकतम १ हजार १०० रुपैयाँ तोकेको छ। खसी-बोकाको मासुको मूल्य अचानक बढेको भन्दै उपभोक्ताबाट उजुरी तथा गुनासो आएपछि प्रशासनले यस्तो व्यवस्था गरेको हो।
कार्यालयले असोज २९ गते सूचना जारी गर्दै जिल्लाभर खसी–बोकाको मासु प्रतिकेजी १ हजार १०० रुपैयाँभन्दा बढी मूल्यमा बिक्री नगर्न व्यवसायीलाई अनुरोध गरेको छ । प्रशासनका अनुसार यसअघि पनि खसी–बोकाको मासुको मूल्य प्रतिकेजी १ हजार १०० रुपैयाँ कायम गरिएको थियो ।
केही मासु विक्रेताले सोही मूल्यमा बिक्री गर्ने प्रतिबद्धता व्यक्त गरे पनि मूल्यवृद्धि नियन्त्रण गर्नुपर्ने अवस्था देखिएपछि प्रशासनले पुनः सूचना जारी गरेको हो । कार्यालयले तोकिएको मूल्यभन्दा बढीमा मासु बिक्री गरेको पाइएमा कानुनबमोजिम कारबाही गर्ने चेतावनीसमेत दिएको छ । उपभोक्तालाई राहत दिन र मासुको मूल्यमा हुने अस्वाभाविक वृद्धि नियन्त्रण गर्न यो व्यवस्था लागू गरिएको जिल्ला प्रशासन कार्यालयले जनाएको छ ।