धरानः प्रहरीलाई छल्दै भाग्दै गरेको स्कारपियो गाडी अन्ततः दुर्घटनामा परेको छ । दुर्घटनामा परेको स्कारपियो गाडीबाट प्रहरीले ३९८ किलो गाँजा बरामद गरेको छ ।
विराटनगरस्थित आयल निगम अगाडि शनिबार राति दुर्घटनामा परेको को १ च ७३९९ नम्बरको स्कारपियोेबाट १३ वटा प्याकेटमा राखिएको अवस्थामा गाँजा बरामद भएको प्रहरीले जनाएको छ ।
इटहरीबाट विराटनगरतर्फ जाँदै गरेको स्कारपियो शनिबार राति करिब १० बजे आयल निगम अगाडि अर्को कारसँग ठोक्किएर दुर्घटनामा परेको थियो । दुर्घटनापछि प्रहरीले गाडी जाँच गर्ने क्रममा गाँजा फेला पारेको जिल्ला प्रहरी कार्यालय मोरङका प्रहरी निरीक्षक लेखनाथ दाहालले जानकारी दिए ।

उनका अनुसार दुर्घटनामा स्कारपियोको अगाडिको भागमा क्षति पुगेको छ । दुर्घटनापछि चालक गाडी छाडेर फरार भएका छन् । उनको खोजी भइरहेको प्रहरीले जनाएको छ ।
बरामद गाँजा कहाँबाट ल्याइएको र कहाँ लैजान लागिएको थियो भन्ने खुलेको छैन । गाँजा ओसारपसारमा संलग्न व्यक्तिको पहिचान तथा घटनाको थप विवरण पत्ता लगाउन अनुसन्धान भइरहेको प्रहरीले जनाएको छ ।
प्रहरीका अनुसार कोशी प्रदेशका पहाडी जिल्लाबाट उत्पादन तथा संकलन गरिएको गाँजा विभिन्न माध्यमबाट तराईका सीमावर्ती क्षेत्रसम्म ल्याउने र त्यहाँबाट भारततर्फ तस्करी गर्ने गरिएको छ । पहाडी क्षेत्रमा तुलनात्मक रूपमा सस्तोमा पाइने गाँजा भारतमा महँगो मूल्यमा बिक्री हुने भएकाले यसको अवैध ओसारपसार हुने गरेको प्रहरीको भनाइ छ ।
दुर्घटनामा परेको सो गाडी अहिले प्रहरीको नियन्त्रणमा छ । प्रहरीले फरार चालकको खोजी गर्नुका साथै गाँजा ओसारपसारमा संलग्न अन्य व्यक्तिबारे समेत अनुसन्धान अघि बढाएको जनाएको छ ।