धरानः धरानको भानुचोकबाट प्रहरीले गाँजासहित भारतीय स्कारपियो गाडीसहित पक्राउ गरेको छ ।
भेडेटारबाट धरानतर्फ आउँदै गरेको बिआर ११ ३०३९ नम्बरको स्कारपियो गाडीलाई शंका लागेर रोक्न खोज्दा नरोकी गाडी हुइँक्याएपछि प्रहरीले धरान–८ सेउती खोलाको पुलमा पुगेर चालकसहित १६ बोरा गाँजा बरामद गरेको जनाएको छ ।
५ गते अन्दाजी २३ः३० बजेको समयमा धरान– २ भानुचौकमा वडा प्रहरी कार्यालय धरानबाट प्रहरी वरिष्ठ नायब निरीक्षक प्रविनकुमार भट्टराईको कमाण्डमा खटिएको प्रहरी टोलीले भेडेटारबाट धरान आउँदै गरेको सो स्कारपियोलाई तत्कालै रोक्न खोजेको थियो ।
नरोकी भागेपछि निरीक्षक भट्टराई र अस्थायी प्रहरी चौकी तीनकुने धरानबाट प्रहरी सहायक निरीक्षक वीरबहादुर भण्डारीको कमाण्डमा खटिएको प्रहरी टोलीले धरानको सेउती पुलबाट पक्राउ गरी चेकजाँच गर्दा गाडीमा १६ बोरा (नापतौला गर्दा ४९९ के.जी.) लागूऔषध गाँजा फेला परेको प्रहरीले जनाएको छ ।
गाडी चालक मोरङ विराटनगर महानगरपालिका–१३ झमेली चौक बस्ने ३२ वर्षीय अजयकुमार साह पक्राउ गरी थप अनुसन्धान भइरहेको इलाका प्रहरी कार्यालय धरानका डिएसपी भीषणबाबु राईले जानकारी दिए ।