धरानः धरानमा नेपाली कांग्रेस सुनसरी क्षेत्र नम्बर–१ को निर्वाचन सम्पन्न भएको छ ।
निर्वाचनले सुनसरी क्षेत्र नम्बर–१ को क्षेत्रीय सभापतिमा धरानका पूर्वमेयर तिलक राई निर्वाचित भएका छन् । धरान सभागृहमा भएको मतदानमा राईले प्रतिद्वन्द्वी विनोद आले मगरलाई ५५१ मतले पराजित गर्दै विजयी बनेका हुन् । ७८० मत खस्दा मगरले ११२ मत मात्रै ल्याए ।
यसअघि क्षेत्रीय सभापतिको लागि सचित शर्मासहित तीनजनाको उम्मेदवारी परेको थियो । पछि शर्माले उम्मेदवारी फिर्ता लिएका थिए । मगरसँग छलफलबाटै टुङग्याउने र सर्वसम्मतिको पहल भएपनि सम्भव नभएपछि निर्वाचनको माहौल बनेको थियो ।
२७ वडा रहेको सुनसरी क्षेत्र नम्बर–१ मा धरान उपमहानगरपालिकाका २०, बराहक्षेत्र नगरपालिकाका ५ र रामधुनी नगरपालिकाका २ वडाका कांग्रेस क्षेत्रीय प्रतिनिधिहरू निर्वाचनमा सहभागी थिए । नवनिर्वाचित सभापति राईले अब क्षेत्रभित्र कांग्रेसको संगठनलाई थप व्यवस्थित र चलायमान बनाउने तथा आगामी निर्वाचनमा पार्टीलाई बलियो बनाउने बताएका छन् ।
क्षेत्रीय सचिवमा बासुदेव बराल, सहसचिवमा महिलाबाट रमिता श्रेष्ठ र पुरुषबाट युवराज शंकर सर्वसम्मतले छानिएका छन् ।