धरानः धरानको बीपी प्रतिष्ठानमा तोडफोड भएको छ । उपचारका क्रममा १४ वर्षीया दीपिका तामाङको मृत्यु भएपछि आक्रोशित आफन्तले बुधबार प्रतिष्ठानको कार्यालयमा तोडफोड गरेका हुन् ।
धरान उपमहानगरपालिका–१५ की दीपिका पेट दुख्ने समस्या भएपछि मंगलबार बिहान साढे ७ बजे प्रतिष्ठानमा भर्ना भएकी थिइन् । उपचारकै क्रममा मंगलबार राति साढे ८ बजे उनको मृत्यु भएको आफन्तले बताएका छन् । बिरामीको मृत्यु भएपछि आक्रोशित आफन्तले उपचारमा संलग्न चिकित्सकको लापरबाहीका कारण दीपिकाको मृत्यु भएको आरोप लगाउँदै प्रतिष्ठानको निर्देशक कार्यालय, बिल काउन्टर र आर्थिक प्रशासन शाखामा तोडफोड गरेका थिए ।
दीपिकाका दाजु भूपेन्द्र तामाङले बच्चा वार्डमा कार्यरत् चिकित्सकको चरम लापरबाहीका कारण बहिनीको मृत्यु भएको आरोप लगाएका छन् । प्रतिष्ठानका प्रवक्ता प्रा.डा.शमशेर श्रेष्ठले उपचारका क्रममा दीपिकाको मुटुमा समस्या देखिएपछि सिटी स्क्यान गर्नसमेत समस्या आएको र अस्पतालको स्वास्थ्य प्रोटोकलअनुसार नै दीपिकाको उपचार गरिएको दाबी गरेका छन् । उनले चिकित्सकको उपचारका कारण नभई बिरामीमा रहेको जटिल रोगका कारण मृत्यु भएको बताए ।
मृतकका आफन्त र प्रतिष्ठान प्रशासनबिच वार्ता भएको थियो । प्रतिष्ठानका निर्देशक इन्द्र लिम्बूले तत्कालका लागि छलफल भएपछि सहमति भएको बताए । उनले मृतकका आफन्तले उपचारमा संलग्न चिकित्सकको टोलीले सार्वजनिक रूपमा माफी माग्नुपर्ने, दीपिकाको सम्पूर्ण उपचार खर्च प्रतिष्ठानले व्यहोर्नुपर्ने माग राखेको बताए ।
आफन्तले राखेका मागबारे प्रतिष्ठान प्रशासनका प्रमुखलगायत सम्बन्धित पक्षसँग थप छलफल गर्ने सहमति भएको छ । दीपिकाको मृत्युको कारण तथा उपचारमा चिकित्सकीय लापरबाही भए नभएको विषयमा प्रतिष्ठानले छानबिन समिति गठन गर्ने जनाएको छ ।