धरानः दशैं, तिहार र छठजस्ता प्रमुख चाडपर्व नजिकिएसँगै भाटभटेनी सुपरमार्केटले ग्राहकका लागि टाटा पन्च ईभी जित्न सकिने विशेष चाडपर्व योजना सार्वजनिक गरेको छ।
भाटभटेनी सुपरमार्केट र नेपालका लागि टाटा मोटर्सको आधिकारिक वितरक सिप्रदी ट्रेडिङ प्रालिको सहकार्यमा ल्याइएको योजनाअन्तर्गत ग्राहकले दुई वटा नयाँ टाटा पन्च ईभी जित्ने अवसर पाउनेछन्।
योजनाअनुसार भाटभटेनीका देशभर रहेका कुनै पनि स्टोरबाट एकपटकमा २ हजार ५ सय रुपैयाँ वा सोभन्दा बढीको सामान खरिद गर्ने ग्राहक लक्की ड्रमा सहभागी हुन सक्नेछन्। खरिदका क्रममा प्राप्त बिलका आधारमा ग्राहकको नाम योजनामा दर्ता गरिनेछ र योजनाको अन्त्यमा लक्की ड्रमार्फत एक जना विजेता छनोट गरी नयाँ टाटा पन्च ईभी प्रदान गरिनेछ।
त्यसैगरी, भाटभटेनीमा सामान खरिद गरी नेपालपे क्यूआरमार्फत भुक्तानी गर्ने ग्राहकले पनि अर्को नयाँ टाटा पन्च ईभी जित्ने अवसर पाउनेछन्। यसरी चाडपर्वको अवधिमा भाटभटेनीबाट किनमेल गर्ने दुई जना भाग्यशाली ग्राहकले टाटा पन्च ईभी जित्न सक्ने कम्पनीले जनाएको छ।
कम्पनीका अनुसार नयाँ टाटा पन्च ईभी आधुनिक इलेक्ट्रिक एसयूभीका रूपमा नेपाली बजारमा उपलब्ध छ। यो एक्टिभी प्लेटफर्ममा आधारित रहेको छ भने ३२ किलोवाट घण्टा र ४० किलोवाट घण्टा क्षमताका दुई ब्याट्री विकल्पमा उपलब्ध छ। नेपालमा गरिएको परीक्षणअनुसार यसले एकपटक पूर्ण चार्जमा ३०० देखि ३२५ किलोमिटरसम्म यात्रा गर्न सक्ने कम्पनीको दाबी छ।
पन्च ईभीमा १९५ मिलिमिटर ग्राउन्ड क्लियरेन्स, ५–स्टार सुरक्षा रेटिङ, ६ वटा एयरब्याग, ३६० डिग्री क्यामेरा, फास्ट चार्जिङ, आवाजबाट सञ्चालन गर्न सकिने सनरुफ, २६.०३ सेन्टिमिटरको हरमन इन्फोटेनमेन्ट तथा डिजिटल ककपिट, भेन्टिलेटेड सिट र ३६६ लिटरको बुट स्पेसलगायतका सुविधा रहेको जनाइएको छ।
सिप्रदीका अनुसार टाटा मोटर्सका देशभरका २० वटा शोरुमसँगै अब भाटभटेनीका २८ वटा स्टोरबाट पनि टाटा गाडीबारे जानकारी लिन सकिनेछ। चाडपर्वको अवधिमा भाटभटेनीमा किनमेल गर्ने टाटा कारका ग्राहकलाई थप विशेष अफर तथा सरप्राइजसमेत उपलब्ध गराइने कम्पनीले जनाएको छ।