धरानः धरानमा ५ जना युवा लागूऔषधसहित पक्राउ परेका छन् ।
धरान उपमहानगरपालिका वडा नं. १४ हात्तीसारपथबाट प्रहरीले ५ जनालाई समाएको हो ।
कोशी प्रदेश प्रहरी कार्यालय विराटनगरको पिआइटी टोली र इलाका प्रहरी कार्यालय धरानबाट प्रहरी बरिष्ठ नायब निरीक्षक सन्दीप कार्कीको कमाण्डमा खटिएको संयुक्त प्रहरी टोलीले स्थानीय राजकुमार डंगोलको घरमा डेरा गरी बस्ने पाँचजनालाई युवालाई लागूऔषध खैरो हिरोइन (ब्राउन सुगर) सहित पक्राउ गरेको हो ।
पक्राउ पर्नेमा धरान–१५ गोविन्दमार्ग बस्ने २५ वर्षीय सौरभ जिमी, धरान–२० बस्ने २२ वर्षीय सुगम राई, धरान–१४ बस्ने २१ वर्षीय अविजित निरौला, धरान–१३ बस्ने २५ वर्षीय आशिष राई, मोरङ लेटाङ न.पा. १ बस्ने २६ वर्षीय हरि लिम्बू रहेको इलाका प्रहरी कार्यालय धरानका डिएसपी भीषणबाबु राईले जानकारी दिए ।
उनीहरूको कोठाबाट ब्राउन सुगर नापतौल गर्दा प्लाष्टिकबाहेक १२४ ग्राम ४७ मिलिग्राम र नाइट्राजेपाम ४४५ ट्याब्लेट, स्पासपेन ६५ ट्याब्लेट, ट्रामोल १५ क्याप्सुलसहित उनीहरूलाई पक्राउ गरिएको प्रहरीले जनाएको छ ।
प्रहरीले उनीहरूमाथि थप अनुसन्धान थालेको जनाएको छ ।