धरानः एकैदिन तीन छुट्टाछुट्टै स्थानमा भएको दुर्घटनामा तीनजनाको मृत्यु भएको छ ।  ट्रकले मोटरसाइकललाई ठक्कर दिँदा एकजनाको मृत्यु भएको छ ।

इटहरीबाट गाईघाटतर्फ जाँदै गरेको को१क.३४१८ नम्बरको ट्रकको अगाडिको टायर पम्चर भई अनियन्त्रित भई विपरीत दिशाबाट आउँदै गरेको लु.प्र.०२–००२ प.२८५८ नम्बरको मोटरसाइकललाई ठक्कर दिन पुगेको थियो । उदयपुरको बेलका–६ किराँत चोकस्थित मदन भण्डारी लोकमार्ग सडक खण्डमा भएको सो दुर्घटनापछि ट्रक सडकको उत्तर साइडमा अन्दाजी ५ मिटर तल झरी पल्टिएको थियो ।

मोटरसाइकल चालक रोल्पाको स्युरी–३ बस्ने ५६ वर्षीय दले पुन मगर गम्भीर घाइते बने थिए । उनको पछाडि बस्ने दाङको घोराही उपमहानगरपालिका–१३ बस्ने ४५ वर्षीय भानु पुन मगर पनि गम्भीर घाइते बनेकी थिइन् । उनीहरू दुवैजना श्रीमान श्रीमती हुन् । उनीहरूको बेलका नगर अस्पताल रामपुरमा सामान्य उपचारपश्चात् थप उपचारको लागि धरानस्थित बीपी कोइराला स्वास्थ्य विज्ञान प्रतिष्ठान धरान ल्याइएको र दले पुनको उपचारका क्रममा मृत्यु भएको प्रहरीले जनाएको छ ।

दुर्घटनामा ट्रक चालक मोरङ सुन्दरहरैंचा–३ लोचनी टोल बस्ने ४८ वर्षीय वीरेन्द्र उराव, सहचालक सुन्दरहरैंचा–५ बस्ने २२ वर्षीय आकाश पोखरेल घाइते बनेका छन् । उनीहरूलाई प्रहरीले नियन्त्रणमा लिएको छ । घटना सोमबार करिब ४ बजेको हो । धरानमा उपचारका क्रममा पुनको करिब साढे ४ बजे मृत्यु भएको प्रहरीले जनाएको छ ।

यस्तै, मोरङको धनपालथान गाउँपालिका–६ मा हुलाकी सडकखण्डमा दुई मोटरसाइकल आपसमा ठोक्किँदा एकजनाको मृत्यु भएको हो। सोमबार साँझ करिब ६ः४० बजे दुर्घटना भएको प्रहरीले जनाएको छ ।
प्रहरीका अनुसार रंगेलीबाट विराटनगरतर्फ आउँदै गरेको को१९प ७७४७ नम्बरको मोटरसाइकल र विपरीत दिशातर्फ जाँदै गरेको को १९ प २ नम्बरको मोटरसाइकल आपसमा ठोक्किएका थिए । दुर्घटनामा को१९प ७७४७ नम्बरको मोटरसाइकल चालक विराटनगर महानगरपालिका–७ मिलन चोकका २२ वर्षीय दिलिप विकको मृत्यु भएको छ । गम्भीर घाइते विकलाई उपचारका लागि विराटनगरस्थित कोशी अस्पताल पुरयाइएकोमा चिकित्सकले मृत घोषणा गरेका थिए ।
मोटरसाइकलका चालक धनपालथान गाउँपालिका–५ का २५ वर्षीय रुपेश सरदार घाइते भएका छन् । उनको अवस्था सामान्य रहेको र कोशी अस्पतालमा उपचार भइरहेको प्रहरीले जनाएको छ ।
यस्तै, मोटरसाइकलले पैदलयात्रीलाई ठक्कर दिई भएको दुर्घटनामा एकजनाको मृत्यु भएको छ । मोरङको बुढीगंगा गाउँपालिका २ स्थित नेपाल फियुल सेन्टर अगाडि कोशी लोक मार्गमा विराटनगरबाट नेमुवातर्फ आउँदै गरेको कोशी प्र.०२ ०६१ प.७८५२ नम्बरको मोटरसाइकलले साइकललाई ठक्कर दिई दुर्घटना हुँदा एकजनाको मृत्यु भएको छ ।
मोटरसाइकलमा सवार सिरहा लहान–३ बस्ने १८ वर्षीय डाइमनकुमार कुश्वाहाको उपचारका चिकित्सकले मृत घोषणा गरेको प्रहरीले जनाएको छ । उनको विराट टिचिङ अस्पतालमा उपचारका क्रममा मृत्यु भएको प्रहरीले जनाएको छ ।
मोसामा सवार सिरहा–२ बस्ने १७ वर्षीय राहुल कुश्वाहा घाइते बनेका छन् । साइकलयात्री सुनसरीको दुहबी–१ बस्ने वर्ष २२ को साहजीत मियाँ पनि घाइते बनेका छन् । दुर्घटना सोमबार साँझ ६ बजेको हो ।