धरानः धरानमा घरको छतबाट लडेर एकजनाको मृत्यु भएको छ ।
धरान–१५ मा घरको छतबाट खसेर १० महिनाको बालक काइरम श्रेष्ठको मृत्यु भएको प्रहरीले जनाएको छ । छतबाट खसेलगत्तै धरानस्थित बीपी प्रतिष्ठानमा उपचारका लागि ल्याइएको र थप उपचारका लागि न्यूरो हस्पिटल विराटनगर लगिएको थियो । उपचारका क्रममा मृत्यु भएको प्रहरीले जनाएको छ ।
प्रहरीका अनुसार बुधबार बालकको आमा सुतिरहेको समयमा दुईतले घरको छतबाट अचानक ती बालक छतबाट खसेर घाइते बनेका थिए । गम्भीर घाइते उनको उपचारका लागि अस्पताल लगिएको थियो । शव पोस्टमार्टमका लागि अस्पताल ल्याइएको प्रहरीले जनाएको छ । घटनाबारे थप अनुसन्धान भइरहेको प्रहरीको भनाइ छ ।
यस्तै, धरान–५ मा साइकल कुदाउने क्रममा खोल्सीमा खसेर एकजना बालक गम्भीर घाइते बनेका छन् ।
घाइते हुनेमा धरान–५ बस्ने १३ वर्षीय दीपेश लिम्बू रहेको प्रहरीले जनाएको छ । साइकल कुदाउँदै गर्दा अनियन्त्रित भई साइकलसहित आँपटार खोल्सीमा खस्न पुगेको अस्थायी प्रहरी हवल्दार हरिबहादुर कार्कीले जानकारी दिए ।
घाइते बालकको तत्कालै उपचारको लागी बीपी प्रतिष्ठान ल्याइएको थियो । हाल उनको विराटनगरस्थित विराट मेडिकल अस्पतालमा थप उपचार भइरहेको प्रहरीले जनाएको छ ।