धरानः कारमा मोटरसाइकल ठोक्किँदा एकजनाको मृत्यु भएको छ भने एकजना गम्भीर घाइते भएका छन् ।
मृत्यु हुनेमा मोटरसाइकलमा सवार उदयपुरको चौदण्डीगढी नगरपालिका २ माडीबास बस्ने ४३ वर्षीय तिलक राई रहेको प्रहरीले जनाएको छ । यस्तै, मोटरसाइकलमा पछाडि सवार ३१ वर्षीय शरण राई गम्भीर घाइते रहेको प्रहरीले जनाएको छ । घाइते शरणको हाल धरानस्थित बीपी प्रतिष्ठानमा उपचार भइरहेको छ ।
चौदण्डीगढी नगरपालिका वडा नं. ६ स्थित मदन भण्डरी राजमार्गको सशस्त्र क्याम्प अगाडि (सातधारे) मा सो दुर्घटना भएको हो । गाईघाटबाट रामपुरतर्फ जाँदै गरेको बाग्मती प्रदेश ०१–०२६ च ५०६२ नम्बरको कारमा बेल्टारबाट गाईघाटतर्फ आउँदै गरेको प्रदेश १–०५–००१ प ८८४९ नम्बरको २२० सिसीको मोटरसाइकल ठक्कर खाइ दुर्घटनामा परेको जिल्ला प्रहरी कार्यालयका डिएसपी राजन चापागाईले जानकारी दिए ।
गम्भीर घाइते दुवैजनाको नगर अस्पताल वेल्टारमा उपचार भएको थियो । उपचारका क्रममा तिलकको मृत्यु भएको प्रहरीले जनाएको छ । घुमाउरो सडक भएका कारण दुर्घटना भएको कोशी प्रदेश ट्राफिक प्रहरी कार्यालय इटहरीले जानकारी दिएको छ । दुर्घटनामा संम्लग्न कार र चालक नुवाकोट बेलकोटगढी नगरपालिका-३ का ५६ वर्षीय बासुदेव सापकोटालाई नियन्त्रणमा लिएर अनुसन्धान सुरु गरिएको डीएसपी चापागाईले बताए ।