धरानः मलद्वारमा प्रतिबन्धित लागूऔषध खैरो हिरोइन (ब्राउन सुगर) लुकाएर ल्याएको आरोपमा धरानका दुईजना पक्राउ परेका छन् ।
पक्राउ पर्नेमा धरान उपमहानगरपालिका वडा नं. ५ बस्ने २६ वर्षीय विशाल अछामी र ३८ वर्षीय बिरु लिम्बू रहेका छन् । इनरुवा नगरपालिका वडा नं. ४ बसचोकस्थित अस्थायी प्रहरी चौकी बसपार्क इनरुवा सुनसरीबाट खटिएको प्रहरी टोलीले लौकहीबाट इनरुवातर्फ पैदल आउँदै गरेका उनीहरूको साथबाट लागूऔषध ब्राउन सुगर फेला परेको प्रहरीले जनाएको छ ।
शंका लागेर शरीर खानतलासी तथा चेकजाँच गर्दा विशालको मलद्वारको भागबाट लागूऔषध ब्राउन सुगर ४.७८ ग्राम फेला परेको जिल्ला प्रहरी कार्यालय सुनसरीका डिएसपी चन्द्रबहादुर खडकाले जानकारी दिए । बरामद गरिएको ब्राउन सुगरसहित उनीहरूमाथि थप अनुसन्धान भइरहेको पनि उनले जानकारी दिए ।