सांकेतिक तस्वीर

सुनसरीः सुनसरीको कोशी गाउँपालिका–१ स्थित लौकही बजारबाट नक्कली नोटसहित दुईजनालाई प्रहरीले पक्राउ गरेको छ ।
पक्राउ पर्नेहरुमा भारत बिहारका ३१ वर्षीय रामनाथ राय र सुन्दरहरैंचा मोरङका २० वर्षीय सन्देश उराव रहेका छन । पक्राउ परेका उनीहरुको साथबाट प्रहरीले नेपाली रुपैयाँको नक्कली नोट १ हजार दरको ४ थान बरामद गरेको छ ।
लौकही बजारमा रहेको मनिष किराना पसलमा उनीहरूले सामान किनमेल गरी १ हजारको नोट दिएकोमा सो नोट नक्कली रहेको शंका लागेर पसलेले तत्काल प्रहरीलाई खबर गरेका थिए । इलाका प्रहरी कार्यालय लौकहीबाट खटिएको प्रहरी टोलीले उनीहरुलाई पक्राउ गरेको हो । प्रहरीले पक्राउ परेका उनीहरुको साथबाट २ थान र सामान किनेको दुईवटा पसलबाट १–१ थान एक हजार दरको नेपाली रुपैयाँको नक्कली नोट बरामद गरेको थियो ।
नक्कली नोटसहित पक्राउ परेका दुवैजनाको जिल्ला प्रहरी कार्यालय सुनसरीबाट थप अनुसन्धान भइरहेको प्रहरीले जनाएको छ ।