तस्वीरः कृष्णराज शाक्य

धरानः जसले एकैखलामा ५० मुरी धान फलाए, उनै किसानलाई नगदसहित सम्मान गर्दै पुरस्कृत गरिएको छ ।
संखुवासभाको पाँचखपन नगरपालिका वडा नं. ६ मा यस्तो नौलो र सुखद प्रयास थालिएको वडाध्यक्ष विष्णु श्रेष्ठले जानकारी दिए ।
आ.व ०८१–०८२ बाट विनियोजित बजेट शीर्षकअन्तर्गत एकैखलामा सबैभन्दा बढी धान उत्पादन गर्ने किसानलाई वडा नं ६ ले यसरी सम्मानसहित नगद २० हजार दिएर पुरस्कृत गरेको हो । तल्लो बाझे खेतमा कृषक सलबहादुर कार्कीले एकैखलामा ५० मुरी भन्दा बढी धान फलाएका थिए ।
५० मुरीभन्दा बढी धान फलाउने किसानलाई पुरस्कृत गर्दै यस्तो प्रयास थालिएको वडाध्यक्ष श्रेष्ठ बताउँछन् । जनप्रतिनिधि र कर्मचारी किसानका खला–खेतमै पुगेर धानको लेखाजोखा गरेका थिए । खेतमै पुगेर उनीहरूले किसानलाई सम्मान गरेका हुन् । ‘वडाले धान फलाउने किसानलाई नगदसहित पुरस्कार दिन थालेको हो, उनले भने, ‘यसले किसानलाई थप हौसला मिल्ने ठानेका छौं ।’
धान उत्पादन वृद्धि गर्ने उद्देश्यले यस्तो योजना अगाडि सारिएको उनको भनाइ छ ।