धरानः धरान उपमहानगरपालिका-२० मा स्थित चिन्डेडाँडा (रमितेडाँडा) जाने बाटो फराकिलो बनाउने साथै अन्य संरचना थप गर्ने काम धमाधम भइरहेको छ ।
धरान-१३ सर्दु खोलाको पुलपारी रहेको कच्ची सडकदेखि केहीमाथिदेखि कालीखोला माथिल्लो तहसम्मको करिब दुई किलोमिटर सडक फराकिलो बनाउँदै निर्माण कार्य धमाधम भइरहेको हो ।
धरान उपमहानगरपालिकाका वरिष्ठ इन्जिनियर सुरज श्रेष्ठका अनुसार प्रदेश सरकारको समपुरक अनुदानमार्फत् १ करोड ५० लाख रुपैयाँको लगानीमा सडक बन्दै गरेको हो । ‘प्रदेश सरकारले समपूरक अनुदानमार्फत् १ करोड दिएको हो त्यसमा उपमहानगरपालिकाले ३० प्रतिशत लगानी गरेको छ, ठेक्काचाहिँ कममै लागेको छ, करिब ९६ लाखमा ठेक्का लागेको छ ।’ उनले जानकारी दिए ।
जेठ मसान्तसम्ममा सक्ने हिसाबले काम भइरहेको सिद्धकाली निर्माण सेवा कम्पनीले जनाएको छ । एक साइड ३४२ मिटर ड्रेन, एजिङ वाल, साइडमा ग्याविङ वाल साथै कजवेमा होमपाइपसहित सडक फराकिलो बन्ने भएको हो ।
धरान–१३ बाट चिन्डेडाँडा पुग्न कच्ची बाटो छ । हिँडेर जाँदा करिब ४५ मिनेट लाग्ने सो ठाउँमा मोटरसाइकल वा गाडीमा जाँदा १५ मै पुगिन्छ । अहिले सो बाटो निर्माण भएपछि स्थानीयबासी खुशी भएका छन् ।
पहिलादेखि नै चिन्डेडाँडा आन्तरिक पर्यटकको आकर्षक गन्तव्य थियो । बिहान र बेलुकीपख ‘हाइकिङ’ गर्दै साथै स्वास्थ्यका लागि धरानबासी पुग्ने गरेका थिए भने आन्तरिक र बाह्य पर्यटक सो ठाउँमा दिनहुँजसो पुगिरहन्छन् । धरान बजारको रमणीय दृश्य देखिनुका साथै तरहरा, इटहरीलगायत तराईका अन्य ठाउँ, चारकोसे झाडीको समेत दृश्यावलोकन गर्न सकिने भएकाले चिन्डेडाँडामा दिनहुँजसो पर्यटक पुग्ने गरेका छन् ।
रमाइलो र घमाइलो चिन्डेडाँडामा बसेर दृश्यावलोकन गर्नुको आनन्द नै वर्णन गरेर साध्य छैन । पहिला रमित हेर्ने डाँडा भएकोले स्थानीयबासीले रमितेडाँडा भनेर चिन्ने गरेको यो स्थान पछिल्लो समय चिन्डेडाँडा रहन गएको बताएका छन् ।
अहिले सर्दुखोलामा पुल निर्माण भएपछि चिन्डेडाँडा पुग्न झनै सहज भएको छ । धरान उपमहानगरपालिकाका मेयर हर्कराज राई साम्पाङको नेतृत्वमा चिन्डेडाँडामा किरात राई समुदायको देउता सुम्निमा पारुहाङ प्रतिमा बनाइने भनेर थप प्रचार समेत हुन थालेपछि अहिले सो स्थान अझै चर्चामा छ । सो स्थानमा इटहरीबाट देखिने सुम्निमा पारुहाङको प्रतिमा (मूर्ति) बनेपछि देशीविदेशी पर्यटकको समेत ओइरो लाग्ने र पर्यटन क्षेत्रले तीब्र रुपमा फड्को मार्ने मेयर साम्पाङ बताउँछन् । तस्वीरहरुः हाम्रो कोशी आवाज