धरानः सुनसरीका पत्रकारहरूले बिहीबार जिल्ला प्रशासन कार्यालयमा धर्ना दिएका छन् ।
कोशी प्रदेश सरकारले समाचार लेखेकै आधारमा पत्रकारलाई १ लाख ५० हजार रुपैयाँसम्म जरिवाना गर्ने प्रावधान ल्याएको र कोशी प्रादेशिक आमसञ्चार प्रतिष्ठानमा अध्यक्षलाई औपचारिक मात्र बनाएर कार्यकारी अधिकार सरकारद्वारा नियुक्त रजिस्टारलाई दिने व्यवस्थाको विरोध जनाउँदै महासंघ आन्दोलनमा ओर्लेको हो । विवादास्पद दफा संशोधन नगरे सडक आन्दोलन चर्काउने चेतावनीसमेत पत्रकारहरूले दिएका छन् । शान्तिपूर्ण धर्ना कार्यक्रममा केहीबेर प्रहरी–पत्रकार घम्साघम्सीसमेत भएको थियो ।
कोशी प्रदेश सरकारले ल्याएको आमसञ्चार विधेयकमा समाचार लेखेकै आधारमा पत्रकारलाई दण्डित गर्ने गरी ल्याएको प्रावधान खारेज गरिनुपर्ने मागसहित उनीहरुले जिल्ला प्रशासन कार्यालयमा धर्ना दिएका हुन् ।
महासंघका पूर्व अध्यक्ष अमर खड्काले प्रेस स्वतन्त्रता विरोधी कदमबाट सरकार पछाडि नहटे अर्थात् आमसञ्चार विधेयक संशोधन नभएसम्म आन्दोलन जारी रहने बताए ।
नेपाल पत्रकार महासंघ कोशी प्रदेशले गत भदौ ९ गतेदेखि चरणबद्ध आन्दोलन गरेको थियो । जसअनुसार नेपाल पत्रकार महासंघ सुनसरीको अगुवाईमा जिल्ला प्रशासन कार्यालय पुगेर करिब एकघण्टा धर्ना दिएको हो । ‘कोशी प्रदेश आमसञ्चार विधेयकमा रहेका प्रेस स्वतन्त्रता विरोधी प्रावधान खारेज गर’ भन्ने नारासहित पुगेका उनीहरुले त्यहाँ धर्ना दिएका हुन् ।
सरकारले राजनीतिक नियुक्ति तोकेको रजिस्टारलाई समाचारबारे उजुरी लिनेदेखि जरिवाना असुल गर्ने र क्षतिपूर्ति भराउनेसम्मको अधिकार दिने व्यवस्था गरिएकोमा महासंघले आपत्ति जनाएको छ । यसैबीच कोशी प्रदेशका १४ वटै जिल्लामा पत्रकारले धर्ना दिएका छन् ।
तस्वीरहरूः लक्ष्मण थापा