धरानः पर्यटकीय भेडेटारदेखि ४ किलोमिटर माथि रहेको पछिल्लो समय पर्यटकको आकर्षणको केन्द्र बन्दै गएको नाम्जे गाउँमा होमस्टेसँगै चारतारे होटल सञ्चालनमा आउने भएको छ ।
६–७ महिनापछि रिदी रिसोर्ट नाम दिइएको होटल सञ्चालनमा आउन लागेको हो । करिब २० करोडको लगानीमा अत्याधुनिक होटल सञ्चालनमा आउन लागेको होटल एशोसिएसन अफ भेडेटारका संस्थापक अध्यक्ष विष्णु श्रेष्ठले जानकारी दिए । विदेशी समेत भित्र्याउने लक्ष्यका साथ भेडेटारनजिकै नाम्जेका सो होटल सञ्चालनमा आउन लागेको उनले जानकारी दिए । ‘करिब १३ रोपनी जग्गामा निर्माण हुने होटलमा ६० वटा रुम र बेडसहितको होटल सञ्चालनमा आउँदैछ’, उनी भन्छन् । होटलमा खेल, मनोरञ्जन, क्यासिनो, स्वीमिङ पुल, मसाज, स्पा, ब्यायामशाला, वातालुकुलित कोठा उपलब्ध हुने जनाइएको छ ।
माइक्रो ग्रामीण टुरिजम र हेल्थ टुरिजमको हिसाबले पनि भेडेटार, नाम्जे परिचित छ । साँगुरीगढी गाउँपालिकाका अध्यक्ष जितेन्द्र रुम्दालीले भेडेटार निजी लगानीकर्ताको आकर्षणको केन्द्र बन्दै गइरहेको र चारतारे होटल सञ्चालनमा आउनु खुशीयालीको कुरा भएको बताउँदै निजी लगानीकर्ताले नै चारतारे होटल सञ्चालनमा ल्याउन लागेको जानकारी दिए । ‘भेडेटारमा चाँडै नै स्टार लेवलको होटल सञ्चालनमा आउन लागिरहेको छ’, उनले भने, ‘गाउँपालिकामा नक्सापास गरेर होटल सञ्चालनको लागि अन्तिम तयारीमा छ ।’ सो होटल नाम्जेको थुम्कीको ‘टप’ मा सञ्चालनमा आउन लागेको उनको भनाइ छ ।
स्वदेशी तथा विदेशी पर्यटकलाई सुविधा दिने लक्ष्यसहित सो होटल सञ्चालनमा आउन लागेको उनले जानकारी दिए । निर्माण हुने होटलको मुख्य भवन ५ तलाको रहने र पार्टी, सेमिनार तथा स्पार जीमका लागि छुट्टै भवन निर्माण हुने समेत लक्ष्य राखिएको जनाइएको छ । होटलमा ६० वटा अत्याधुनिक रुमहरु रहनेछन् । जसमध्ये प्रेसिडेन्सियल स्वीट रुम, फेमिली स्वीट रुम, सुपर डिलक्स र डिलक्स रुमहरु रहनेछन् । होटलको डिजाइन नै रुमदेखि सम्पूर्ण सेवा सुविधाहरु चारतारे होटलको मापदण्ड अनुसार गरिने भएको छ । भेडेटार, नाम्जे आउने सबै खालका पाहुनालाई उपयुक्त हुने खालका रुमहरु तयार गरिने सञ्चालकले बताएको उनले जानकारी दिए ।

यस्तो छ सम्भावना
भेडेटार र नजिकको नाम्जेमा स्थानीय प्रशासनसँग मिलेर २४ सै घण्टा अहिले सेवा दिइरहेको समेत उनले जानकारी दिए । भेडेटार, नाम्जे अहिले सबै क्षेत्रको ट्राजिट प्वाइन्ट बन्दैछ । खासगरी विराटनगरदेखि कोशी लोकमार्गको विस्तार, ताप्लेजुङदेखि तमोर कोरिडोर, पाँचथरको रवि–राँकेदेखि भेडेटारसम्मको सडक विस्तारले पनि अहिले भेडेटार पर्यटकीय गन्तव्य बन्दै गइरहेको उनले बताए । उनी विभिन्न आकर्षक प्याकेज बनाएर पनि पर्यटक तान्ने योजना बनाउन सकिने बताउँछन् ।
सुनसरी र धनकुटाको संगमस्थल भेडेटार कोशी प्रदेशमै आकर्षक पर्यटकीय गन्तव्य र घुम्न रुचाउने पर्यटकीय गन्तव्यका रुपमा लिन थालिएको छ । छिनछिनमै मौसम परिवर्तन, चिसो हावापानी भेडेटारका विशेषता हुन् । भेडेटार आसपासमा अहिले करिब ५५ वटा भन्दा बढी होटल सञ्चालनमा छन् । भेडेटारमा दैनिक दुई हजारदेखि २५ सयको संख्यामा पर्यटक घुम्न आउने गरेका छन् । घुम्न आउने कुल पर्यटकको संख्यामा ४० प्रतिशत भारतीय आउने गरेका छन् ।

चम्किएको नाम्जे
मेरिकाको समाचार संस्था सिएनएनले राखेको विश्वको घुम्नैपर्ने आठौं पर्यटकीय गन्तव्यहरूको सूचीमा रहेको धनकुटाको नाम्जे गाउँ होमस्टेले चम्किएको हो । भारतीय मूलका अमेरिकी नागरिक राजीव गोयलको पहलमा सिएनएनले वि.स. २०६८ सालमा आफूले घोषणा गरेको विश्वका १२ औं गन्तव्यमध्ये नाम्जे गाउँलाई ८ औं गन्तव्य सूचीमा राखेको थियो । साँगुरीगढी ६ स्थित गाउँलाई सिएनएनले नौ सूचकका आधारमा नाम्जेलाई आफ्नो गन्तव्य सूचीमा राखेको थियो । आम्माघर, नाम्जे विद्यालय, पम्पिङ खानेपानी, विभिन्न एफएम टावरहरू, मगर जातिको हुर्रा नाच, हात्तीसुँडे झरना, लोप्सेडाँडा, सूर्योदय बुद्धविहार, अर्गानिक गाउँलाई आधार मान्दै आठौं गन्तव्य सूचीमा समावेश गरेको थियो । यही चर्चाले नाम्जे गाउँमा पर्यटक ओइरिन थालेका हुन् । अहिले पनि त्यहाँका जनता घरबास (होमस्टे) मार्फत् अर्गानिक गाउँ बचाउन लागिरहेका छन् । नाम्जेमा अहिले पनि दैनिक एक सय ५० जनालाई सेवा दिने क्षमताको ३५ मगर जातिको घरबास (होमस्टे) सेवा सञ्चालनमा छ ।
होमस्टेले यहाँ उत्पादित अर्गानिक सब्जी, खानपान, पेय पदार्थ र हुर्रानाच लगायत सेवा दिइरहेको छ । गाउँपालिका अध्यक्ष रुम्दालीले अहिले पनि घरबास सेवाको लागि सहयोग, अर्गानिक खेतीमा जोड, मगर जातिको कला, संस्कृति जोगाउन आफूहरु लागिपरेको बताउँछन् । बाह्रै महिना चिसो मौसमसँगै एकसाथ हिमाल, पहाड र तराई हेर्न सकिने नाम्जे गाउँको ग्रामीण जीवनशैली, मगर जातिको संस्कृति र उनीहरुको मीठो आतिथ्यता अहिले पनि छँदैछ । करिब १४ सय ८५ मिटर उचाइमा रहेको नाम्जेमा ९५ प्रतिशत मगर जातिको बसोबास छ । २०७० सालदेखि होमस्टे सञ्चालनमा ल्याइएको हो । होमस्टेमा सस्तो र सुलभ मूल्यमा बास बस्ने, खाने व्यवस्था गरिएको छ ।