धरानः सुनसरीको चतरासम्म यातायातमा सहजता ल्याउन थालिएको तमोर कोरिडोरको काम अहिले पनि भइरहेको छ । अहिले दुई लेनको ट्रयाक खोल्ने काम सम्पन्न भइसकेको छ भने ८० प्रतिशत खण्डमा ग्राभेल भइसकेको छ ।
सुनसरीको चतरादेखि धनकुटाको मूलघाट हुँदै पाँचथर, ताप्लेजुङसम्म पग्ने यो सडकको काम हालसम्म ११२ किमी कालोपत्रे गर्ने कामको लागि ठेक्का सम्झौता भएर केही खण्डमा काम पनि भइरहेको छ । धरानदेखि मेची लोकमार्ग हुँदै ताप्लेजुङसम्म पुग्न लामो दुरीको सडक प्रयोग गर्नुपर्ने बाध्यता हटेको छ । अहिले दोब्बर गुना लामो यात्रा गर्नुपर्ने बाध्यता हटेको र छोटो पर्ने भएकोले अधिकांशले यो बाटो नै प्रयोग गर्ने गरेको स्थानीय बिर्खबहादुर केरुन बताउँछन् । कोरिडोरअन्तर्गत धनकुटाको मूलघाटमा भेटिएका उनले बिर्तामोडको बाटोभन्दा यो करिब ५-६ घण्टा छोटो पर्ने भएकोले यात्रा सहज बनाएको बताए । धरान जान यो बाटो एकदमै छोटो भएको उनी बताउँछन् ।
अहिले सो सडकमा पर्न आउने स्थानीयले होटल व्यवसाय सञ्चालन गर्दै आम्दानी पनि गर्न थालेको धनकुटाको साँगुरीगढीका दिलकुमार लिम्बू बताउँछन् । आफूले तमोर कोरिडोर आएपछि कृषि छाडेर होटल व्यवसाय थालेको उनले बताए । कोरिडोर हुँदै गुड्ने गाडीहरुको चाप बढेसँगै सडक छेऊछाउमा घर भएकाहरुले व्यापार व्यवसायबाट मनग्ये आम्दानी बढाएको उनको भनाइ छ । अहिले त्यहाँ जग्गाको किनबेचसमेत बढ्दै गएको उनी बताउँछन् । चालक जीवन सम्वाहाम्फेले अहिले यो बाटो प्रयोग गर्दा छिटो र सहज भएको बताए ।
भारत र चीनसँग जोड्ने छोटो मार्गको रुपमा समेत हेरिएको यस कोरिडोरले ग्रामीण तथा दुर्ग क्षेत्रहरूमा सडक सञ्जाल विस्तार गरी आर्थिक विकास, व्यापार, स्वास्थ्य, शिक्षामा सहजै पहुँच पुगेको छ । सुनसरीको चतराबाट धनकुटा हुँदै पाँचथरसम्मको १५५ किलोमिटरमध्ये ११२ किलोमिटर सडक कालोपत्रेका लागि २०७९ साल कार्तिकमा चार अर्ब १६ करोड रुपैयाँमा ठेक्का लागेको थियो । अहिले मूलघाटदेखि नावाखोलासम्मको २८ किलोमिटर सडक कालोपत्रेको चरणमा छ । अबको तीन वर्षमा ६६ किलोमिटर सडकको सकिने सम्झौता छ । कोरिडोरमा चार अर्ब १६ करोडमा खर्च गर्दै कालोपत्रे दुई खण्डमा रौताहा क्षमादेवी जेभीले र एपेक्स कम्पनीसँग ठेक्का सम्झौता गरेको कोरिडोर सडक आयोजना प्रमुख प्रदीप निरौला बताउँछन् ।