धरानः झुम्का कारागारमा बिरामी धेरै कैदीबन्दी बिरामी पाइएका छन् ।
इलाका प्रहरी कार्यालय धरानले दिएको जानकारी अनुसार धरानस्थित बीपी प्रतिष्ठानमा आज बुधबार ६ जना र हिजो ६ जना गरी १२ जना उपचाररत छन् । अचानक स्वास्थ्यमा समस्या देखिएसँगै कैदीबन्दीलाई यहाँ ल्याइएको प्रहरीले जनाएको छ ।
रिंगटा लाग्ने, छाती, दुख्ने आलश्स्यता बढ्ने उनीहरुलाई तत्कालै प्रतिष्ठान भर्ना गरिएको थियो । अहिले १२ जनाको अवस्था ठीक हुँदै गएको प्रहरीले जनाएको छ । कैदीबन्दीहरू अचानक बिरामी पर्दै स्थिति असामान्य बन्दै गएपछि अहिले त्यहाँ थप चिकित्सक पुगेको प्रहरीले जनाएको छ ।
सोमबार दिउँसो र शनिबार राति धरान–१० का २४ वर्षीय सागर राई र गढी गाउँपालिका–६ का ४८ वर्षीय रामदेव उराँवको मृत्यु भएको थियो । दुवैलाई श्वासप्रश्वासमा समस्या देखिएपछि प्रतिष्ठानमा भर्ना गरिएकोमा उपचारकै क्रममा मृत्यु भएको सुनसरीका प्रमुख जिल्ला अधिकारी धर्मेन्द्रकुमार मिश्रले जानकारी दिएका छन् ।
लगातार मृत्यु भएपछि जिल्ला सुरक्षा समिति सुनसरीले कारागारमा स्वास्थ्य शिविर सञ्चालन गर्न निर्देशन समेत दिइसकेको छ । १३ दिनको अन्तरालमै झुम्का कारागारमा तीन कैदीको मृत्यु भइसकेको छ । यसअघि भदौ ४ गते धरान–१२ बस्ने भोजपुर हतुवागढीका २८ वर्षीय विकास राईको बीपी प्रतिष्ठानमै उपचारको क्रममा मृत्यु भएको थियो ।
प्रमुख जिल्ला अधिकारी मिश्रले कारागारमा मृत्युको घटनामा कुनै अन्य कारण नभएको समेत सुरक्षा समितिको अनुगमनबाट निष्कर्ष निकालिएको जानकारी समेत दिइसकेका छन् । बारम्बार बिरामी पर्ने सङ्ख्या बढ्दै गएको भन्दै सुरक्षा समितिले कैदीहरूको स्वास्थ्य विवरण संकलन गर्ने, गम्भीर बिरामीलाई स्थानान्तरण गर्ने लगायतका योजना अघि सारेको उनले बताए । हाल झुम्का कारागारका ‘ए’ र ‘बी’ गरी दुई ब्लकमा १ हजार ७९४ जना कैदी रहेका छन् ।