धरानः इटहरीमा प्रहरीको गोली लागेर दुईजनाको मृत्यु भएको छ । इटहरी प्रहरीका अनुसार २५ वर्षका र अर्का ३० वर्षका दुई युवाको मृत्यु भएको छ ।
गोली लागेर मृत्यु हुने युवकको पहिचान खुलेको छ । जेन–जी पुस्ताको आन्दोलन नियन्त्रणमा लिन प्रहरीले चलाएको गोली लागेर मृत्यु भएका दुईमध्ये एकजनाको पहिचान खुलेको हो । मृत्यु भएकामध्ये इटहरी १६ का २३ वर्षीय अभिषेक श्रेष्ठको पहिचान खुलेको हो । जिल्ला प्रहरी कार्यालय सुनसरीका प्रहरी निरीक्षक प्रकाश पराजुलीले श्रेष्ठको मृत्यु भएको पुष्टि गरे । घाइतेहरूलाई बीपी कोइराला स्वास्थ्य विज्ञान प्रतिष्ठान धरान ल्याएपछि चिकित्सकले दुईजनालाई मृत घोषणा गरेका हुन् । दोहोरो झडपका क्रममा एक जना सशस्त्र प्रहरी घाइते भएका छन् । प्रदर्शनकारीले इटहरी उपमहानगरपालिकाका प्रमुखको कार्यकक्षमा आगजनी पनि गरेका छन्।
भ्रष्टाचार र सामाजिक सञ्जालमाथिको प्रतिबन्धविरुद्ध सडकमा उत्रिएका युवा प्रदर्शनकारीहरूले प्रहरीको सुरक्षा घेरा तोड्दै मेयरको कार्यकक्षमा प्रवेश गरी तोडफोड र आगजनी गरेको स्थानीय प्रशासनले जनाएको छ। सुनसरीका प्रमुख जिल्ला अधिकारी धर्मेन्द्रकुमार मिश्रका अनुसार इलाका प्रहरी कार्यालय इटहरीमा ढुंगामुढा भएपछि प्रहरीले गोली चलाएको थियो ।
इटहरीस्थित नगरपालिका कार्यालयमा आन्दोलनकारीले तोडफोड र आगजनी गरेपछि अपराह्न झडप भएको थियो । झडपपछि प्रशासनले इटहरीमा कफ्र्यु आदेश जारी गरेको थियो । प्रहरीले नगरपालिकाको आगजनीमा संलग्न भएको भन्दै केही युवालाई पक्राउ गरेपछि आक्रोशित प्रदर्शनकारीले इलाका प्रहरी कार्यालयमा ढंगामुढा गरेका थिए ।
त्यसक्रममा प्रहरीले गोली चलाएको हो । आन्दोलनकारीले नगरपालिकाका एउटा भवनमा आगो लगाएका छन् ।
सोमबार उपमहानगरपालिकाको कार्यालयअगाडि भेला भएका विभिन्न कलेज र विद्यालयका विद्यार्थीहरूले भ्रष्टाचार र सामाजिक सञ्जालमाथिको प्रतिबन्धको विरोधमा नाराबाजी गर्दै प्रदर्शन गरेका थिए।