धरानः सोलुखुम्बुको लोबुचेमा अल्टिच्युट एयरको हेलिकोप्टर दुर्घटना भएको छ । सोलुखुम्बुस्थित सगरमाथा आधार शिविरनजिकै लबुचेमा आज (बुधबार) बिहान अल्टिच्युड एयरको हेलिकप्टर दुर्घटना भएको हो ।
सगरमाथा आधार शिविर नजिकै लोबुचेमा आज बिहान उक्त हेलिकोप्टर दुर्घटनामा परेको जिल्ला प्रहरी कार्यालय सोलुखुम्बुका डीएसपी मनोजित कुँवरले जानकारी दिए ।
हेलिकप्टरमा पाइलट विवेक खड्का मात्र रहेको र उनी सकुशल रहेको कुँवर बताए । पर्यटकको उद्धारको लागि गएको हेलिकोप्टर ल्यान्ड गर्ने क्रममा हिउँमा चिप्लिएर दुर्घटनामा परेको हो ।
सोलुखुम्बुको लोबुचेमा दुर्घटनामा परेको अल्टिच्युट एयरको हेलिकोप्टर खराब मौसमबीच आज बिहान पौने ८ बजे लुक्लाबाट उडेको खुलेको छ ।
नेपाल नागरिक उड्डयन प्राधिकरणका प्रवक्ता ज्ञानेन्द्र भुलका अनुसार अल्टिच्युट एयरको ९ एन एएमएस सो हेलिकोप्टर लुक्लाबाट बिहान पर्यटक उद्दारका लागि लोबुचे हेलिप्याड पुगेको थियो ।
हेलिकोप्टरमा क्याप्टेन विवेक खड्का मात्रै सवार रहेको प्रवक्ता भुलले जानकारी दिए । दुर्घटनापछि क्याप्टेन खड्कालाई लुक्ला ल्याइएको छ ।