धरानः सुनसरीमा मोटरसाइकल दुर्घटनामा एकजनाको मृत्यु भएको छ ।
तीनजना सवार मोटरसाइकल दुर्घटनामा परेको हो । पूर्व–पश्चिम राजमार्गमा को१ख ५१२८ नम्बरको टिपर टायर पम्चर बई बिग्रेर साइडमा रोकिराखेको अवस्थाको मोटरसाइकलमा ठोक्किएर दुर्घटना भएको इलाका प्रहरी कार्यालय रामधुनीका प्रहरी निरीक्षक हरि सुवेदीले जानकारी दिए ।
झुम्काबाट इनरुवातर्फ जाँदै गरेको प्रदेश १–०२–०४३ प ५८२२ नम्बरको मोटरसाइकल पछाडिबाट ठोक्किन गई दुर्घटना हुँदा चालक इनरुवा नगरपालिका वडा नं.८ बस्ने २९ वर्षीय विनोद चौधरीको मृत्यु भएको प्रहरीले जनाएको छ ।
टाउकोमा चोट लागेका उनको गम्भीर अवस्थामा उपचारका लागि विराट नर्सिङ होम लगिएको र उपचारका क्रममा उनको मृत्यु भएको प्रहरीले जनाएको छ । मोटरसाइकल पछाडि सवार इनरुवा–८ कै २० वर्षीय आर्यन चौधरी, २८ वर्षीय आशिष चौधरी समेत घाइते भएका छन् । उनको अवस्था सामान्य रहेको छ ।
टिपर चालक सुनसरीको कोशी गाउँपालिका ३ बस्ने ४८ वर्षीय लालमोहमद मियाँ प्रहरीको सम्पर्कमा रहेको प्रहरीले जनाएको छ । मोटरसाइकल चालकले सडकमा ध्यान नदिँदा र तीब्र गतिका कारण दुर्घटना भएको प्रहरीको निष्कर्ष छ ।