बालेनले बोलेको बाचा पूरा गरे, तिर्खारहने धरानेलाई कोशीको पानी ल्याएर प्यास मेटाउने, नगर सरकार खुशी

धरानः धरानबासीको लागि खुशीको खबर । वर्षौदेखि खानेपानीको सङ्कट झेलिरहेको धरानका लागि कोशीबाट ‘मेकानिकल लिफ्टिङ’ मार्फत् पानी आउने भएको छ ।
तिर्खारहने धरानेलाई कोशीको पानी ल्याएर प्यास मेटाउन संघीय सरकारले आर्थिक वर्ष २०८३–०८४ बजेटमा समेटेको छ । धरान उपमहानगरपालिकाको एकीकृत खानेपानी तथा व्यवस्थापन आयोजनाअन्तर्गत ‘कोशी–चतरा खानेपानी आयोजना’ निर्माण कार्यका लागि ४९ करोड ९९ लाख ४७ हजार रुपैयाँ विनियोजन भएको छ ।
करिब कोशीको पानी ल्याउन ३ अर्ब रुपैयाँ बजेट लाग्ने र बहुवर्षीय योजनाअन्तर्गत यसपटक यति रकम विनियोजन भएको हो । यस्तै, धरान (सप्तकोशी नदी स्रोत) खानेपानी आयोजनाको आयोजना व्यवस्थापन तथा सुपरभिजन परामर्श सेवाका लागि पनि २१ लाख रुपैयाँ विनियोजन भएको छ ।
यस्तै, धरान रंगशालामा फ्लाइलाइट निर्माणका लागि ३ करोड रुपैयाँ छुट्टिएको छ । यस्तै, धरान नगरभित्रका विभिन्न सडक मर्मतका लागि एकमुष्ट १ करोड ५० लाख, पूर्वाधार निर्माणका लागि एकमुष्ट ३ करोड, धरान–५ स्थित अँधेरी खोलामा पुल निर्माण कार्यलाई बहुवर्षीय योजनामा समावेश गरी आवश्यक बजेट विनियोजन भएको छ ।
बजेट विनियोजन भएपछि सांसद हर्क साम्पाङ पनि खुशी देखिएका छन् । उनले सामाजिक सञ्जाल फेसबुकमा लेखेका छन् । खानेपानीको लागि मोटो रकम सहयोग गर्नु भएकोमा नेपाल सरकारलाई हार्दिक धन्यवाद !
धरान उपमहानगरपालिकाका कार्यवाहक मेयर अइन्द्रविक्रम बेघाले संघीय सरकारले बजेट विनियोजन गरेकोमा खुशी व्यक्त गर्दै धरानको खानेपानी, सडक, खेलकुद तथा समग्र पूर्वाधार विकासलाई थप गति दिने विश्वास लिएको बताए । उनले पनि बजेट विनियोजन गरिदिएको भन्दै प्रधानमन्त्री बालेन्द्र शाहलाई धन्यवाद दिएका छन् ।

बालेनले बाचा पूरा गरे
खानेपानीको समस्या समाधानका लागि प्रधानमन्त्री बालेन शाहले इटहरीस्थित आयोजित सभामा बोलेको बाचा पूरा गरेका छन् । बालेनले त्यतिबेला धरानबासीलाई पानी खुवाउने जिम्मा म लिन्छु भनेर घोषणालाई धरान र आसपासका क्षेत्रमा निकै चासोका साथ हेरेका थिए । यसअघि इटहरीमा बालेन प्रधानमन्त्री नभई इटहरी आउँदा पनि कोशीको पानी ल्याएर धरानेको प्यास मेट्ने बताएका थिए ।
इटहरीको सभामा बोल्दै प्रधानमन्त्री बालेनले धरानको खानेपानी समस्या समाधानका लागि रास्वपाले नेतृत्व लिने बालेनले बताएका थिए । कोशीबाट पानी ल्याउन यसअघि नै डिपिआर भए पनि काम अघि नबढेको भन्दै उनले अन्य दलका प्रतिनिधिलाई व्यङ्ग्य गर्दै भनेका थिए–खानेपानीको व्यवस्थापन कोशीबाट मेकानिकल लिफ्टिङ गरेर धरानमा ल्याउन लगभग ५÷६ अर्ब लाग्छ । तर सायद यहाँको जनप्रतिनिधि सरकारमा पुगेन होला, त्यहाँको पार्टी पुगेन होला, अब रास्वपा पुग्छ ।
यसअघि धरानका मेयर छँदा हर्क साम्पाङले ऋणमार्फत् अघि बढाउन नचाहेको कोशीबाट पानी ल्याउने योजना अघि बढाउने बालेनले बताएका थिए ।
साम्पाङले आफ्नो कार्यकालमा श्रमदानमार्फत कोकाहा, पकुवा र सर्दु खोलाका पानी धरान ल्याएर चर्चा कमाएका छन् । उनले पनि यसअघि धरानको मेयर छँदा खानेपानीको लागि प्रयत्न भने नगरेका भने होइनन् ।
हर्कले धरानबासीको लागि पानी खुवाउन निकै मरिहत्ते गरेका थिए । धरानका खोलाखाल्सी चहार्नेदेखि कोकाहको खानेपानी ल्याएर पानी खुवाउन उनी सफल भएका थिए । उनले खोलाखाल्सी चहार्दै खोलाका पानीमा सुधारेर ल्याएको पानी, कोकाहबाट पानी ल्याएको पानी साथै प्रदेश सरकारले निर्माण गरेको वेलबाट आएको पानीले अहिले धरानबासीलाई केही राहत भने छ । अहिले धरानमा खासै खानेपानीको समस्या नभएपनि भविष्यमा यसले खानेपानीको सङ्कट निम्त्याउनेछ । साम्पाङले कोशीको पानी धरान ल्याउन निकै मरिहत्ते गर्दै केपी ओली प्रधानमन्त्री हुँदा पटक पटक सिंहदरबार धाइरहे । साम्पाङ सिंहदरबारमा रित्तो गाग्री नै बोकेर पुगेका थिए ।
सांसद भइसकेपछि साम्पाङले कोशीको पानीको लागि बजेट पारिदिन पहल गरेका थिए भने धरान उपमहानगरपालिकाका कार्यवाहक मेयर अइन्द्रविक्रम बेघाले पनि पत्र पठाएका थिए ।