धरानः सुनसरीमा लागूऔषधसहित पक्राउ पर्ने क्रम जारी छ ।
बराहक्षेत्र नगरपालिका वडा नं.–३ भरौलीमा ३८ वर्षीय विष्णु धामीको घरमा लागूऔषध बिक्री वितरण भइरहेको छ भन्ने प्राप्त सूचनाको आधारमा कोशी प्रदेश प्रहरी कार्यालय विराटनगर, लागूऔषध नियन्त्रण ब्यूरो विराटनगर र इलाका प्रहरी कार्यालय महेन्द्रनगरबाट संयुक्तरुपमा खटिएको टोलीले लागूऔषधसहित पक्राउ गरेको हो ।
घरमा चेकजाँच तथा खानतलासी गर्दा लागूऔषध ब्राउन सुगर २०८ ग्राम र नगद १ लाख ८२ हजार ५०० फेला परेको प्रहरीले जनाएको छ । विष्णु र उनीसँगै कोठामा रहेका ३३ वर्षीय रुद्रबहादुर सुवेदीलाई पनि लागूऔषध र नगदसहित नियन्त्रणमा लिई इलाका प्रहरी कार्यालय महेन्द्रनगरमा ल्याई थप अनुसन्धान भइरहेको प्रहरीले जनाएको छ ।
यस्तै, इटहरी उपमहानगरपालिका वडा नं. १७ पकलीमा ओखलढुङगाको सिद्धिचरण नगरपालिका वडा नं. १ बस्ने युवराज बस्नेत र मोरङको सुन्दरहरैंचा नगरपालिका वडा नं.–८ बस्ने २४ वर्षीय लालबहादुर थापामध्ये युवराज बस्नेतको साथबाट ०.६८ ग्राम ब्राउन सुगरसहित पक्राउ परेका छन् ।
उनीहरूले सो लागू औषध जिल्ला सुनसरी इटहरी उप–महानगरपालिका वडा नं.–१७ बस्ने सौकात मियासँग खरिद गरेको पोल खोलेपछि उनलाई पनि पक्राउ गरिएको प्रहरीले जनाएको छ ।
इटहरी उपमहानगरपालिका वडा नं. १७ पकलीमा रहेको स्टारलाइट खाजा घर (होटल) मा सो होटलका सञ्चालक साहीदुल मियाको साथबाट ०.९६ ग्राम ब्राउन सुगर फेला परेको र उनलाई समेत पक्राउ गरेको प्रहरीले जनाएको छ ।
सुनसरीको रामधुनी नगरपालिका वडा नं.–६ सौरनामा ४८ वर्षीय विजय राजधामीको साथबाट ६२.९३ ग्राम ब्राउन सुगर र नगद ६३ हजार ८२० रुपैयाँसहित पक्राउ गरिएको जिल्ला प्रहरी कार्यालय सुनसरीले जनाएको छ ।