धरानः मोरङको ग्रामथान गाउँपालिका–६ झोवाबनीमा देवरको खुकुरी प्रहारबाट एक महिलाको हत्या भएको छ ।
स्थानीय कपिल खवासकी श्रीमती अन्दाजी २० वर्षीया सीमा राजवंशीलाई उनकै देवर अन्दाजी २१ वर्षीय सौचन खवासले खुकुरीले घाँटीमा प्रहार गर्दा घटनास्थलमै मृत्यु भएको हो ।
घटनामा ४७ वर्षीय शिवलाल खवास (ठूलोबुबा) समेत घाइते भएका छन् । उनको दाहिने काँधमा गहिरो चोट लागेको छ । उनको स्थानीय नेता चोकस्थित मेडिकलमा उपचार भइरहेको छ र स्वास्थ्य अवस्था मध्यम रहेको छ ।
घटनाको जानकारी प्राप्त भएपछि इलाका प्रहरी कार्यालय हरैंचाबाट तथा इलाका प्रहरी कार्यालय बेलबारीबाट खटिएको प्रहरी टोलीले खुकुरीसहित आरोपित सौचन खवासलाई नियन्त्रणमा लिएको छ । घटनाबारे थप अनुसन्धान भइरहेको छ । इलाका प्रहरी कार्यालय बेलबारीका इन्स्पेक्टर राजीव गिरीको नेतृत्वमा पुगेको टोलीले घटनाको अनुसन्धान अघि बढाएको छ।
प्रहरीका अनुसार हत्या हुनुको कारण अझै खुलेको छैन। मृतकका पति कपिल खवास भने रोजगारीका सिलसिलामा काठमाडौंमा बस्दै आएका छन्। प्रहरीले घटनाको विस्तृत अनुसन्धान जारी रहेको जनाएको छ।