धरानः धरानमा अलपत्र अवस्थामा रहेको धरान-८ स्थित मदन-भण्डारी राजमार्गले ज्यान लियो, धेरैको खुट्टा भाँच्चियो तर कल्भर्ट भने वर्षौ भयो बनेको छैन । पहिला कल्भर्टको डिजाइनमा बनाइएको भएपनि अहिले पुल हाल्नुपर्ने अवस्था नै आएको छ । ठूलो भ्वाङ परेको र भ्वाङ समेत बढ्दै गएर अहिले पुल नै निर्माण गर्नुपर्ने अवस्थामा पुगेको हो ।
यसअघि कुलमान घिसिङ मन्त्री हुँदा आएर अनुगमन गरे, बनाइहाल्छौं भनेर आश्वासन दिए तर बनाएनन् । धेरै अभियन्ता, स्थानीय नेताले पनि भिडियो बनाउँदै दबाव सिर्जना गरे तर अलपत्र नै बनिरह्यो कल्भर्ट । स्थानीय सरकारले घचघच्याउने काम भने गरयो तर सुनुवाइ भएको छैन ।
२०८१ साउन २३ गतेको वर्षापछि चैत महिनामा निर्माण सम्पन्न भएको सो राजमार्गको सडक वर्षाले दुईटुक्रा बनाएको थियो । सडक विभाग र ठेकेदारले बाटो निर्माण गर्दा हेलचक्राई गरेकाले निर्माण सम्पन्न भएको छोटो समयमै बाटो भत्किएको स्थानीयले बताएका छन् । उहिल्यै घोपा क्याम्पको समयमा बेलायती सरकारले पुल बनाएकै स्थानमा पुल थापिँदा भत्काएको हो ।
राजमार्गअन्तर्गत रहेको तीनढ्वाङगेस्थित सडकको खोल्सामा ठूलो भ्वाङ परेको छ । केहीदिनअघि सोही भ्वाङमा अचानक एक युवा मोटरसाइकलसहित खस्दा युवा घाइते बने । घाइते युवाको खुट्टासमेत भाँच्चिएको छ । सडकको जीर्ण रहिरहँदा दुईजनाले ज्यान गुमाइसकेका छन् भने दर्जनौं सवारी साधन भ्वाङमा परिरहेका छन् ।
सडक विभाग, केन्द्र सरकार, प्रदेश सरकार तथा स्थानीय सरकारबाट पटक–पटक आश्वासन आएपनि निर्माण कार्यले गति लिन नसकेको स्थानीयबासी बताउँछन् ।
पुल नभएको जोखिमपूर्ण सडकमा आवश्यक सुरक्षा संकेत, चेतावनी बोर्ड, ब्यारिकेड र रात्रिकालीन रिफ्लेक्टर जस्ता न्यूनतम सुरक्षा व्यवस्थासमेत नहुँदा सर्वसाधारण र यात्रुहरूले पटक–पटक दुर्घटनाको सामना गर्नु परिरहेको छ ।
यसैबीच बारम्बार सवारी दुर्घटना हुन थालेपछि राष्ट्रिय स्वतन्त्र पार्टी (रास्वपा) धरानले ध्यानाकर्षण जनाउँदै स्थलगत अनुगमन समेत गरेको छ । बढ्दो दुर्घटना र जोखिमलाई मध्यनजर गर्दै रास्वपा धरानका सहसचिव सन्दिप शाक्यको नेतृत्वमा विज्ञ सदस्य नगेन्द्र ओझा र सदस्य सनम थापासहितको टोलीले सो क्षेत्रको स्थलगत अवलोकन गरेको हो । अवलोकनपछि टोलीले भविष्यमा हुन सक्ने सम्भावित दुर्घटना न्यूनीकरण तथा सर्वसाधारणको जिउधनको सुरक्षाका लागि तत्काल कदम चाल्नुपर्ने निष्कर्ष निकालेको छ ।
अनुगमनपश्चात् रास्वपा टोलीले सडक आयोजनाका सब–इन्जिनियरलाई भेटेर सो स्थानको जोखिमपूर्ण अवस्थाबारे गम्भीर ध्यानाकर्षण गराएको छ ।
पुल निर्माण कार्य प्रारम्भ हुनु अगावै सम्भावित दुर्घटना रोक्न सडकमा तत्काल ब्यारिकेड, रिफ्लेक्टर र चेतावनी बोर्ड जस्ता अस्थायी सुरक्षा व्यवस्थाहरू मिलाउनुपर्ने आफूहरुको निष्कर्ष रहेको उनले जानकारी दिए ।