धरानः सुनसरीमा पिकअप दुर्घटना हुँदा एकजनाको मृत्यु भएको छ ।
सुनसरीको कोशी गाउँपालिका वडा नं. ७ केराबारीस्थित पूर्व पश्चिम लोकमार्ग सडक खण्डमा पश्चिमबाट पूर्वतर्फ जाँदै गरेको टाटा कम्पनीको २९५६ सिसीको प्र.१–०२–००२ च ४८३१ नम्बरको पिकअप आफै अनियन्त्रित भई सडकमा उत्तानो भई पल्टिँदा एकजनाको मृत्यु भएको हो ।
दुर्घटनामा पिकअप चालकमोरङको रंगेली नगरपालिका-३ दर्वेशाका ४२ वर्षीय पदम राईको मृत्यु भएको जिल्ला प्रहरी कार्यालय सुनसरीका प्रहरी नायब निरीक्षक सुरेशकुमार यादवले जानकारी दिए ।
टाउकोमा चोट लागेर गम्भीर घाइते बनेका राईको इनरुवा अस्पतालमा उपचारका क्रममा चिकित्सकले मृत घोषणा गरेका थिए । बुधबार राति करिब १०ः५० बजेतिर आफैँ अनियन्त्रित भई सडकमा पल्टिएको पिकअपबाट उद्धार गरी जिल्ला अस्पताल इनरुवा लगिएपनि राति करिब ११ः५० बजे चिकित्सकले उनलाई मृत घोषणा गरेको प्रहरीले जनाएको छ । पिकअपमा सवार मोरङ विराटनगर-१३ बस्ने सन्तोषकुमार यादव सामान्य घाइते बनेका छन् । पिकअप चालकले सडकमा ध्यान नदिएको र तीब्र गतिमा दुर्घटना भएको पाइएको प्रहरीले जनाएको छ ।