धरानः सुनसरीमा प्रहरीले पानीमा तैरिरहेको अवस्थामा ३१२ केजी गाँजा फेला पारेको छ ।
सुनसरी कोशी गाउँपालिका वडा नं. ७ केराबारी र भाण्टाबारीबीचको भाग कोशी नदीको बाँधको किनार छेऊमा जिल्ला प्रहरी कार्यालय सुनसरी र इलाका प्रहरी कार्यालय भाण्टाबारीबाट संयुक्तरूपमा खटिएको प्रहरी टोलीले गस्ती गर्दै जाने क्रममा ३१२.१५ के.जी. गाँजा फेला पारेको हो ।
नदीको किनार छेऊमा पानीमा तैरिरहेको अवस्थामा ८ वटा कालो प्लास्टिकले बेरिएको शंकास्पद पोकाहरू हेर्दा गाँजा फेला परेको प्रहरीले जनाएको छ । लागूऔषध बरामद गरी जिल्ला प्रहरी कार्यालय सुनसरीमा ल्याई थप अनुसन्धान गर्ने कार्य भइरहेको साथै संलग्न ब्यक्तिहरुको खोजतलास गर्ने कार्य समेत भइरहेको जिल्ला प्रहरी कार्यालय सुनसरीका प्रहरी प्रवक्ता डिएसपी चन्द्रबहादुर खड्काले जानकारी दिए ।