धरानः अविरल वर्षाका कारण धनकुटा र पाँचथरको सीमामा बग्ने नावा खोलामा पानीको बहाव उच्च भएपछि तमोर कोरिडोर अवरुद्ध भएको छ ।
अहिले पाँचथर, धनकुटा र ताप्लेजुङतर्फको आवागमन प्रभावित भएको छ । बिहानदेखि यात्रुवाहक तथा मालवाहक सवारीसाधन दुवैतर्फ रोकिएका छन् । सुनसरीको धरानदेखि धनकुटाको मुलघाट हुँदै पाँचथर र ताप्लेजुङलाई जोड्ने द्रुतमार्गका रूपमा परिचित यो सडक बिहीबार बिहानदेखि अवरुद्ध भएको हो ।
पाँचथरको तुम्बेवा गाउँपालिका–२ स्थित नावा खोलामा पानीको सतह एक्कासी बढेपछि खोलामाथिको सडक डुबानमा परेको र सवारीसाधन सञ्चालन पूर्णरूपमा रोकिएको जिल्ला प्रहरी कार्यालय पाँचथरका प्रहरी नायब उपरीक्षक अनिषकुमार कर्णले जानकारी दिए । लगातारको वर्षासँगै आएको बाढीका कारण तमोर कोरिडोर तत्कालका लागि अवरुद्ध भएको हो । पानीको बहाव अत्यधिक रहेकाले यात्रु तथा सवारी चालकलाई जोखिमपूर्ण यात्रा नगर्न उनले आग्रह गरे ।
वर्षा नरोकिएकाले खोलाको बहाव अझ बढ्न सक्ने सम्भावनालाई ध्यानमा राख्दै नदी आसपासका बासिन्दा तथा यात्रुलाई उच्च सतर्कता अपनाउन प्रहरीले आग्रह गरेको छ । मनसुन सक्रिय भएसँगै पहाडी जिल्लाका नदी तथा खोलामा पानीको बहाव बढ्दो क्रममा रहेकाले अत्यावश्यकबाहेकको यात्रा गर्दा मौसम र सडकको अवस्थाबारे जानकारी लिएर मात्र यात्रा गर्न जिल्ला प्रशासनले अनुरोध गरेको छ ।