धरानः सुनसरीको इनरुवाबाट प्रहरीले लागूऔषधसहित पक्राउ गरेको छ ।
इनरुवा–४ बसपार्कमा प्रहरीले खोजीखोजी युवालाई पक्राउ गरेको हो ।
पूर्व–पश्चिम राजमार्गमा जिल्ला प्रहरी कार्यालय सुनसरी र अस्थायी प्रहरी पोष्ट बसपार्क इनरुवाबाट संयुक्तरुपमा खटिएको प्रहरी टोलीले पश्चिमबाट पूर्वतर्फ आउँदै गरेको को३८प २३८९ नम्बरको स्कुटरलाई शंका लागेर पछयाएको थियो ।
स्कुटर चालक धनकुटा महालक्ष्मी नगरपालिका वडा नं. ९ बस्ने वर्ष २३ को उज्ज्वल मादेन र पछाडि सवार भोजपुर हतुवागढी गाउँपालिका वडा नं. ५ बस्ने वर्ष ३२ को रोशन राईलाई चेकजाँच गर्दा उनीहरूको साथबाट लागूऔषध ब्राउन सुगर फेला परेको प्रहरीले जनाएको छ । ब्राउन सुगर २.८९ ग्राम (दुई ग्राम आठ सय नब्बे मिलिग्राम) फेला परेको थियो ।
यस्तै, बसपार्कमै पूर्व–पश्चिम राजमार्गमा जिल्ला प्रहरी कार्यालय सुनसरी र अस्थायी प्रहरी पोष्ट बसपार्क इनरुवाबाट संयुक्त रुपमा खटिएको प्रहरी टोलीले ब्राउन सुगरसहित नै पक्राउ गरेको छ ।
पश्चिमबाट पूर्वतर्फ पैदल आउँदै गरेका मोरङ सुन्दरहरैँचा नगरपालिका वडा नं.१० बस्ने वर्ष २७ को राजन उराँव र उर्लाबारी नगरपालिका वडा नं.–०४ बस्ने वर्ष ३४ को प्रकाश उराँवलाई चेकजाँच गर्दा निजहरुको साथबाट लागूऔषध ब्राउन सुगर जस्तो देखिने पदार्थ २२.४५ ग्राम फेला परेको प्रहरीले जनाएको छ । उनीहरूलाई लागूऔषध र स्कुटरसहित नियन्त्रणमा लिई जिल्ला प्रहरी कार्यालय सुनसरीमा ल्याई थप अनुसन्धान भइरहेको प्रहरीले जनाएको छ ।