धरानः सुनसरीमा अवस्था नियन्त्रणबाहिर पुगेको भन्दै नेपाली सेना परिचालन गरिएको छ ।
सुनसरीको देवानगन्ज गाउँपालिका–३ कप्तानगन्जमा कफ्र्यु आदेश उल्लंघन गर्दै प्रदर्शनकारीले आगजनी र तोडफोड सुरू गरेपछि सेना परिचालन गरिएको हो । प्रदर्शनकारीले पाँचवटा पसलमा तोडफोड र सामानमा आगजनी गरेपछि सेना परिचालन भएको हो ।
बख्तरबन्द गाडी र अत्याधुनिक हतियारसहित सेनाको टोली मैदानमा खटिएपछि मात्रै तनावग्रस्त क्षेत्रको अवस्था क्रमशः नियन्त्रणमा आएको प्रशासनले जनाएको छ । सुनसरीका प्रमुख जिल्ला अधिकारी बासुदेव घिमिरेका अनुसार बिहानदेखि कफ्र्यु अवज्ञा गर्दै सडकमा उत्रिएको भिडले टायर बालेर प्रदर्शन गरेपछि स्थिति तनावग्रस्त बनेको थियो ।
नेपाल प्रहरी र सशस्त्र प्रहरीको ठूलो टोली परिचालन भए पनि बढ्दो भीड नियन्त्रण गर्न कठिन भएपछि नेपाली सेना परिचालन गर्नुपरेको उनले बताए । बख्तरबन्ध गाडीसहित सेनाको हतियारधारी टोली कप्तानगन्ज पुगेर फिल्डमा खटिएको र त्यसपछि प्रदर्शनकारी तितरबितर हुन थालेका कारण अवस्था सामान्यतर्फ उन्मुख भएको जानकारी घिमिरेले दिए ।
प्रजिअ घिमिरेले अवस्था थप बिग्रिए संयुक्तरूपमा नेपाल प्रहरी, सशस्त्र प्रहरी र नेपाली सेनाले आवश्यक सुरक्षा कारबाही अघि बढाइने बताए । उनका अनुसार परिस्थिति नियन्त्रणभन्दा बाहिर गए थप गोली चलाउनुपर्ने अवस्था पनि आउन सक्ने भएकाले सबैलाई संयमता अपनाउन आग्रह गरिएको छ ।
उनले उच्छृङ्खल गतिविधिमा संलग्न व्यक्तिमाथि कानुनअनुसार कडा सुरक्षा कारबाही हुने स्पष्ट पार्दै सेनासहित संयुक्त सुरक्षा टोलीले अब अवस्था नियन्त्रणमा लिइसकेकाले थप क्षति हुन नदिने दाबी गरे ।
कप्तानगन्ज चोकमा टायर बाल्दै नाराबाजी गरेका प्रदर्शनकारी केहीबेरमै तोडफोड र आगजनीमा उत्रिएका थिए । एउटा पक्ष प्रदर्शनमा उत्रिएसँगै अर्को पक्ष पनि भेला हुन थालेपछि थप साम्प्रदायिक वा हिंसात्मक घटना हुन नदिन सेना परिचालन गरिएको प्रशासनले जनाएको छ । कप्तानगन्जको घटनाको विरोधमा सुनसरीको लौकही र फूलचोकमा पनि टायर बालेर प्रदर्शन गरिएको छ । प्रदर्शनका कारण पूर्व–पश्चिम लोकमार्गमा बिहानदेखि नै सवारी आवागमन प्रभावित भएको छ ।
राजमार्गमा सवारी साधन रोकिँदा यात्रुहरू समस्यामा परेका छन् । सुरक्षा चुनौती बढेपछि कोशी प्रदेशका विभिन्न जिल्लाबाट पनि थप नेपाल प्रहरी, सशस्त्र प्रहरी तथा दंगा नियन्त्रणका विशेष टोलीहरू सुनसरी पठाइएको छ । कोशी प्रदेशका प्रहरी प्रवक्ता एसएसपी योगेन्द्रसिंह थापाका अनुसार कप्तानगन्जको अवस्था थप संवेदनशील हुन नदिन प्रदेशभरका जिल्लाबाट अतिरिक्त सुरक्षाकर्मी परिचालन गरिएको छ ।