धरानः ट्रकले किच्दा एकजनाको मृत्यु भएको छ ।
मृत्यु हुनेमा मोरङको बुढीगंगा गाउँपालिका ४ अगुर दाना मिलअगाडी सुनसरी गढी गाउँपालिका २ घर भई बुढीगंगा गाउँपालिका ५ स्थित ससुराली घर बस्दै आएका ३५ वर्षीय सुरज ऋषिदेव रहेका छन् ।
लडेर मृत्यु भएको भन्ने इलाका प्रहरी कार्यालय नेमुवामा खबर पुगेको र उपचारका लागि उनलाई तत्कालै विराट टिचिङ अस्पताल लगिएको थियो । आइतबार साँझ ७ बजे चिकित्सकले मृत घोषणा गरेका थिए ।
शवको पोष्टमार्टमका लागि कोशी अस्पताल विराटनगर पठाइएको थियो । पोष्टमार्टम रिपोर्टमा आफै मृत्यु नभई अन्य कारणबाट मृत्यु भएको भन्ने खुल्न आएपछि प्रहरीले अनुसन्धानलाई तीब्रता दिएको मोरङका कार्यालय प्रमुख प्रहरी उपरीक्षक कवित कटवालले जानकारी दिए ।
अनुसन्धानको क्रममा सो घटनामा संलग्न ना७ख ७८८ नम्बरको ट्रक रोकिराखेकोमा ट्रक मुनी (चक्काको मुनि) सुतेको अवस्थामा चालकले ट्रक अगाडि बढाउने क्रममा चक्काले किचेर घटना भएको भनी खुल्न आएको प्रहरीले जनाएको छ ।
ट्रक र ट्रक चालक झापा कचनकवल गाउँपालिका १ बस्ने ३० वर्षीय हरि थापालाई नियन्त्रणमा लिई थप अनुसन्धानको लागि जिल्ला प्रहरी कार्यालय मोरङ पठाइएको प्रहरीले जनाएको छ । घटना गत साउन १० गते आइतबार साँझ ६ः३० बजे भएको हो । प्रहरीले चालकलाई मंगलबार दिउँसो नियन्त्रणमा लिएको छ । प्रहरीले चालकको लापरबाहीका कारण दुर्घटना भएको प्रारम्भिक निष्कर्ष रहेको छ। घटनाबारे थप अनुसन्धान भइरहेको प्रहरीले जनाएको छ।