धरानः उदयपुरको बेलका–५ मा स्कुल बस र अटो एकआपसमा ठोक्किँदा भएको दुर्घटनामा परेका थप एकजनाको मृत्यु भएको छ ।
अटो चालक बेलका–५ मैनी बस्ने २८ वर्षीय इन्द्र थापा मगर धरानमा उपचारका क्रममा मृत्यु भएको प्रहरीले जनाएको छ । टाउको, शरीरको विभिन्न भागमा चोट लागेका उनी बोल्न नसक्ने अवस्थामा थिए ।
दुर्घटनामा सोमबार दुईजनाको मृत्यु भएको थियो । दुर्घटनामा बेलका नगरपालिका–५ मैनी बस्ने ३४ वर्षीया मन्दिरा मगर र अटोमा सवार अर्की एकजना महिला (हाल नाम, उमेर र ठेगाना नखुलेको) को मृत्यु भएको इप्रका प्रहरी प्रमुख इन्स्पेक्टर अश्वीन तोलाङगेले बताए ।
उदयपुरको बेलका नगरपालिका–५ जहडामा अटो र बस एकआपसमा ठोक्किँदा पाँचजना घाइतेमध्ये दुईजनाको धरानमा उपचारका क्रममा तीनजनाको मृत्यु भएको प्रहरीले जनाएको छ । अन्य दुईजना घाइतेको उपचार भइरहेको छ ।
घाइते भएका बेलका नगरपालिका–५ मैनी बस्ने १८ वर्षीय रोशन मगर र मोरङ विराटनगर महानगरपालिका–१२ बस्ने १९ वर्षीय अजित गुरुङको उपचार भइरहेको प्रहरीले जनाएको छ ।
प्रहरीले स्कुल बस र चालक बेलका नगरपालिका–५ घुम्ने बस्ने ३६ वर्षीय विक्रम थापालाई नियन्त्रणमा लिई यसबारे अनुसन्धान भइरहेको जनाएको छ ।
सुपाडेबाट लालबजारतर्फ आउँदै गरेको को.प्र.०५–००१ ह ०६१३ नम्बरको अटो र विपरीत दिशाबाट जाँदै गरेको सफल आदर्श इङलिस बोर्डिङ स्कुलको को१ख ३५१६ नम्बरको बस एकआपसमा ठोक्किएर दुर्घटना भएको हो ।