धरानः ब्रेक फेल भएर बोलेरो दुर्घटना हुँदा एकजनाको मृत्यु भएको छ ।
तेह्रथुम म्याङलुङ–९ बगाले होटलअगाडि मध्य पहाडी लोकमार्ग जिरीखिम्तीबाट म्याङलुङतर्फ जाँदै गरेको प्र.१–०२–००२ च ५६०४ नम्बरको म्याङलुङ–९ मा रहेको रिलाबर हाइड्रो पावर हाउसको २५२३ सिसी हर्ष पावर बोलेरोको पिकअप अचानक ब्रेक फेल भई नालीको भित्तामा ठोकिन पुगेको थियो । बोलेरोमा सवार पावर हाउसका कर्मचारी फेदाप गाउँपालिका ४ जलजले बस्ने ४० वर्षीय टेकबहादुर कट्टेलको उपचारका क्रममा मृत्यु भएको प्रहरीले जनाएको छ ।
टाउको र अनुहारमा चोट लागेर जिल्ला अस्पताल तेह्रथुममा उपचारको क्रममा उनको मृत्यु भएको प्रहरीले जनाएको छ ।
पाँचथरमा अटो अनियन्त्रित भई हुँदा एकजनाको मृत्यु भएको छ ।
फिदिम–८ मान्द्रे भीरमा पौवाभन्ज्याङबाट तमाखे रानीटारतर्फ जाँदै गरेको प्र.१–०१–०२ स ६००७ नम्बरको कम्पनीको २२५ सिसीको अटो आफै अनियन्त्रित भई सडकबाट अन्दाजी ७०० मिटर तल झरी दुर्घटना भएको थियो ।
अटो चालक फिदिम–८ बस्ने ४२ वर्षीय सुजन राईको घटनास्थालमै मृत्यु भएको प्रहरीले जनाएको छ । दुर्घटनापछि अटोमा आगो लागेको प्रहरीले जनाएको छ ।