धरानः कोशी प्रदेशमा सवारी दुर्घटनाको सबैभन्दा ठूलो जोखिम सडक वा सवारीसाधनको अवस्था नभई चालकको व्यवहार र गति देखिएको छ। साउन महिनाको दुर्घटना तथ्यांकले प्रदेशमा हुने अधिकांश दुर्घटना चालककै कारण हुने गरेको देखाएको हो।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका अनुसार साउनमा कोशी प्रदेशका विभिन्न जिल्लामा ४४० वटा सवारी दुर्घटना भए। ती दुर्घटनामा ३१ जनाको मृत्यु भएको छ भने ५९१ जना घाइते भएका छन्।
दुर्घटनामा ६४६ वटा सवारीसाधन संलग्न थिए। तर दुर्घटनाको कारण विश्लेषण गर्दा चालकको लापरवाही सबैभन्दा अगाडि देखिएको छ। कुल दुर्घटनामध्ये ३६५ वटा अर्थात् ८३ प्रतिशत दुर्घटना चालकका कारण भएका छन्।
त्यसमध्ये पनि तीव्र गति मात्रै १९२ दुर्घटनाको कारण बनेको छ। यो कुल दुर्घटनाको ४३.६ प्रतिशत हो। अर्थात् प्रदेशमा साउन महिनामा भएका करिब हरेक दुईमध्ये एक दुर्घटनाको कारण तीव्र गति देखिएको छ।
चालकको अन्य लापरवाहीका कारण १०६ वटा दुर्घटना भएका छन्। चालकको असक्षमताका कारण २६, मादक तथा लागूपदार्थ सेवन गरी सवारी चलाउँदा २४, गलत ओभरटेकका कारण ११ र ट्राफिक नियम उल्लंघनका कारण ६ वटा दुर्घटना भएका छन्।
दुर्घटनाको कारणमा सवारीसाधनको अवस्था तुलनात्मक रूपमा कम देखिएको छ। सवारीसाधनको अवस्थाका कारण १९ वटा दुर्घटना भएका छन्। त्यसमध्ये ब्रेक नलाग्ने वा ब्रेक फेल भएर ११, यान्त्रिक गडबडीका कारण तीन, ओभरलोडका कारण दुई र टायर पन्चर भएर तीनवटा दुर्घटना भएका छन्।
सडकको अवस्थाका कारण पनि १९ वटा दुर्घटना भएका छन्। चिप्लो सडकका कारण मात्रै ६ दुर्घटना भएका छन् भने घुम्ती, मोड तथा उकालोका कारण तीन, खाल्डाखुल्डीका कारण दुई, सडक निर्माण तथा निर्माण सामग्रीका कारण दुई, कच्ची वा जीर्ण सडकका कारण दुई तथा साँघुरो र जोखिमयुक्त सडकका कारण चार दुर्घटना भएका छन्।
यस्तै, सडक प्रयोगकर्ता तथा पैदलयात्रुको व्यवहारका कारण ३२ वटा दुर्घटना भएका छन्। त्यसमा जथाभावी बाटो काट्नु मात्रै २९ दुर्घटनाको कारण बनेको छ।
ट्राफिक प्रहरीले दुर्घटना न्यूनीकरणका लागि चेकजाँच तथा सचेतनामूलक कार्यक्रमलाई निरन्तरता दिएको जनाएको छ। साउनमा मात्रै ट्राफिक नियम उल्लंघन गर्ने ७ हजार ८८८ सवारी तथा चालकलाई कारबाही गरिएको छ।
कारबाहीबाट ७९ लाख ५५ हजार ५०२ रुपैयाँ राजस्व संकलन भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीले जनाएको छ।
प्रहरीका अनुसार दुर्घटना न्यूनीकरणका लागि चालकलाई गति नियन्त्रण, सुरक्षित ओभरटेक, मादक तथा लागूपदार्थ सेवन गरी सवारी नचलाउने र ट्राफिक नियम पालना गर्न सचेत गराउने काम भइरहेको छ।