धरानः मितेरी डेभलपमेन्ट बैंक धरानले रसुवागढी बाढी पीडितका लागि प्रधानमन्त्री दैवीप्रकोप उद्धार कोषमा १० लाख रुपैयाँ पठाएको छ ।
प्रीति भल्भका सञ्चालक तथा मितेरी बैंकका सञ्चालक समितिका सदस्य अन्वेश अग्रवालले पनि तीन लाख रुपैयाँ व्यक्तिगत रकम पठाएका छन् । १३ लाख रुपैयाँ सुनसरीका प्रमुख जिल्ला अधिकारीलाई हस्तान्तरण गरिएको सञ्चालक समितिका अध्यक्ष किसन मास्केले जानकारी दिए ।
गएको भदौ १० गते आएको प्रलयकारी बाढीबाट प्रभावित तथा पीडित परिवारको राहतका लागि धरान–१० स्थित सुमेधा एजुकेसन नेटवर्क प्रा.लि. ले दुईलाख रुपैयाँ सहयोग गरेको छ । प्रा.लि.ले सो प्रधानमन्त्री कोषमा पठाएको हो । संस्थाका तर्फबाट १ लाख ७३ हजार ४ सय रुपैयाँ तथा कर्मचारीहरूको एक दिनको तलब बराबर संकलित २६ हजार ६ सय रुपैयाँ गरी कुल दुई लाख रुपैयाँ सहयोग गरिएको प्रा.लि.का प्रबन्ध निर्देशक सुरेन्द्र घिमिरेले जानकारी दिए ।
यस्तै, धरान–१ स्थित होली गार्डेनका विद्यार्थीले एक दिनको खाजा खर्च र शिक्षकले एकदिनको तलब बाढीपीडितलाई सहयोग गर्ने भएको छ । विद्यार्थी आबद्ध बाल क्लब र स्काउटले सहयोग संकलन अभियान सञ्चालन गर्ने भएका छन् ।

बाढीपीडित परिवारलाई थोरै भएपनि राहत पुरयाउने उद्देश्यले विद्यालयमा शिक्षक, विद्यार्थी र अभिभावकका लागि छुट्टाछुट्टै तीनवटा ‘च्यारिटी बक्स’ राखेर स्वेच्छिकरकम संकलन गरिने होली गार्डेन स्काउट बोइज ट्रुपका लिडर अनिर्माण श्रेष्ठले जानकारी दिए । उनका अनुसार विद्यार्थीले एक दिनको खाजा खर्च बराबरको रकम सहयोग गर्नेछन् ।
श्रेष्ठले विपद्को कठिन अवस्थामा पीडितलाई सहयोग गर्नु सबैको मानवीय दायित्व भएको बताउँदै भने, ‘बाढीबाट भएको यस्तो कहालीलाग्दो अवस्थामा पीडितलाई थोरै भए पनि राहत महसुस हुन्छ । त्यसैले हामीले एक दिन खाजा नखाँदा केही फरक पर्दैन ।’

विद्यालयका शिक्षक तथा कर्मचारीले पनि एकदिनको तलब बराबरको रकम सहयोग गर्ने विद्यालयका प्रिन्सिपल राजेन्द्र गुरुङले जानकारी दिए । विद्यालय परिवारको सामूहिक प्रयासबाट राहत रकम संकलन गरी प्रधानमन्त्री दैवीप्रकोप उद्धार कोषमा पठाउने तयारी गरिएको उनले बताए ।
बाल बगैंचा क्लबका अध्यक्ष रजत भुजेलले अभियानमार्फत एक लाख रुपैयाँसम्म रकम संकलन गर्ने लक्ष्य रहेको बताए । संकलित रकम प्रधानमन्त्री दैवीप्रकोप उद्धार कोषमा पठाइने उनको भनाइ छ ।
त्यस्तै, क्लबकी सचिव श्रीयुता खतिवडाले भदौ १८ गते कृष्ण जन्माष्टमीका दिन विद्यालयमा आयोजना हुने कार्यक्रममा सहभागी हुने अभिभावकलाई पनि स्वेच्छिक सहयोगका लागि आग्रह गरिने बताइन् । उनका अनुसार विद्यार्थीको छुट्टाछुट्टै टोली बनाएर छरछिमेक तथा चिनेजानेका व्यक्तिहरूबाट समेत स्वेच्छिक सहयोग संकलन गरिनेछ ।
१० रुपैयाँदेखि १००० सम्म सहयोग
नेपाली कम्युनिस्ट पार्टी (नेकपा) धरान उपमहानगर समितिले राहत संकलन गरी प्रधानमन्त्री दैवीप्रकोप उद्धार कोषमा पठाएको छ ।
धरानका नेता तथा कार्यकर्ताले बजारका व्यापारी, समाजसेवी तथा सर्वसाधारण नागरिकबाट स्वेच्छिकरूपमा राहत रकम संकलन गरेका थिए । संकलित रकम भानुचोकमा पत्रकार तथा सर्वसाधारणको उपस्थितिमा पारदर्शी ढंगले गणना गरी एकमुष्ट १ लाख १४ हजार ४९० रुपैयाँ प्रधानमन्त्री दैवीप्रकोप उद्धार कोषमा क्यूआरमार्फत पठाइएको पार्टीका धरान उपमहानगर संयोजक सीपी बजगाईंले जानकारी दिए ।

संयोजक बजगाईंका अनुसार बाढीपीडितका लागि सहयोग गर्ने क्रममा नागरिकहरूले आफ्नो गच्छेअनुसार १० रुपैयाँदेखि १००० रुपैयाँ तथा अन्य रकमसमेत स्वेच्छाले सहयोग गरेका थिए । सानो–ठूलो सहयोगभन्दा पनि विपद्को समयमा पीडितप्रति नागरिकले देखाएको मानवीय भावना महत्वपूर्ण रहेको उनले बताए ।
कार्यक्रममा नेकपाका केन्द्रीय सदस्य मुक्सामहाङ मेन्याङ्बोले संकलित राहत रकम वास्तविक बाढीपीडित परिवारसम्म यथाशीघ्र पु¥याउन सरकारसँग आग्रह गरे। विपद्को समयमा राजनीतिक तथा सामाजिक क्षेत्रबाट हुने यस्ता मानवीय पहलले पीडित परिवारलाई राहत र समाजमा आपसी सहयोग तथा एकताको भावना बलियो बनाउने उनको भनाइ थियो ।