धरानः सुनसरी प्रहरीले काँसघारीमा लुकाइराखेको अवस्थामा ५७५ केजी गाँजा फेला पारेको छ ।
कोशी गाँउपालिका–३ श्रीपर जानेबाटो काँसघारीमा लागूऔषध गाँजा लुकाएर राखेको छ भन्ने प्राप्त सूचनाको आधारमा जिल्ला प्रहरी कार्यालय सुनसरीबाट खटिएको प्रहरी टोलीले काँसघारीमा त्रिपालले छोपेर राखेको अवस्थामा सो गाँजा फेला पारेको हो । लागूऔषध गाँजा नियन्त्रणमा लिई जिल्ला प्रहरी कार्यालय सुनसरी ल्याई थप अनुसन्धान गर्ने कार्य भइरहेको प्रहरीले जनाएको छ ।
यस्तै, दुईजना किशोरको साथमा लागूऔषध भेटिएको छ ।
बराहक्षेत्र नगरपालिका–११ मधुवन बजारमा इलाका प्रहरी कार्यालय महेन्द्रनगर सुनसरी र प्रहरी चौकी मधुवन सुनसरीबाट संयुक्तरूपमा खटिएको प्रहरी टोलीले लौकहीबाट प्रकाशपुरतर्फ आउँदै गरेको प्र.०१–०२–०५२ प ९४०३ नम्बरको मोटरसाइकल चालकलाई चेकजाँच गर्दा लागूऔषध भेटिएको प्रहरीले जनाएको छ ।
बराहक्षेत्र नगरपालिका–१० बस्ने वर्ष १९ को दीप कार्की र पछाडि सवार वर्ष १९ को कृष्ण आचार्यलाई शंका लागि खानतलासी तथा चेकजाँच गर्दा निजहरूको साथबाट लागूऔषध ट्रामाडोल ६५० क्याप्सुल र स्पासरेष्ट ५० ट्याब्लेट फेला परेको प्रहरीले जनाएको छ ।
यसैबीच इनरूवा नगरपालिका–४ बसचोकमा जिल्ला प्रहरी कार्यालय सुनसरीबाट खटिएको प्रहरी टोलीले महेन्द्र राजमार्गमा पश्चिमबाट पूर्वतर्फ आउँदै गरेको कोशी प्रदेश ०२–००५ ह ६९५९ नम्बरको सिटी सफारी चालक सुनसरी इटहरी उप–महानगरपालिका–५ बस्ने वर्ष ३४ को अरूण नेपाली र सिटीमा सवार ३५ वर्षीय सुमन कार्कीलाई शंका लागि खानतलासी तथा चेकजाँच गर्दा निजहरूको साथबाट लागू औषध ब्राउनसुगर ०.८२ ग्राम फेला परेको प्रहरीले जनाएको छ ।