धरानः खोटाङमा कार्यरत शिक्षक भानुभक्त राईको कुटपिट तथा ढुंगा प्रहारबाट मृत्यु भएको घटनामा जिल्ला प्रहरी कार्यालय भोजपुरले ११ जनालाई पक्राउ गरी अनुसन्धान अघि बढाएको छ ।
पक्राउ पर्नेमा ६ पुरुष र ५ महिला छन् । पक्राउ पर्नेमा केपिलासगढी गाउँपालिका–७ सुङदेलका २१ वर्षीय प्रबेस भन्ने सागर कोयी राई, २१ वर्षीय मौली भन्ने प्रतीक राई, २५ वर्षीय माइकल भन्ने निशान राई, २३ वर्षीय सुशील राई, ३२ वर्षीय शेरबहादुर भन्ने अमर राई र ३० वर्षीय उमेश भन्ने उमेश दुमी राई रहेका छन् । त्यस्तै ३५ वर्षीया तारादेवी राई, ४८ वर्षीया सुमिता राई, ४३ वर्षीया तेजकुमारी राई, १९ वर्षीया देविका राई र २० वर्षीया चन्द्रकला राई पक्राउ परेका छन् ।
उनीहरू सबै खोटाङको केपिलासगढी गाउँपालिका–७, सुङदेलका स्थानीय रहेको प्रहरीले जनाएको छ । केपिलासगढी गाउँपालिका–७ सुङदेलस्थित सूर्य माध्यमिक विद्यालयमा राहत कोटामा कार्यरत ३९ वर्षीय राईको भोजपुरको साल्पासिलिछो गाउँपालिका–५, दोभाने माबुस्थित भदौरे मेला पुगेका बेला कुटपिटपछि मृत्यु भएको हो ।
प्रहरीका अनुसार भदौ ११ गते राति पौने १२ बजेतिर पुरानो विवादलाई लिएर स्थानीयसँग विवाद भएपछि राईमाथि कुटपिट भएको थियो । त्यस क्रममा ढुंगासमेत प्रहार हुँदा गम्भीर घाइते भएका राईको मृत्यु भएको प्रारम्भिक अनुसन्धानबाट खुलेको छ ।
घटनापछि प्रहरीले कुटपिटमा संलग्न रहेको आशंकामा खोजतलास तीव्र बनाएको थियो । अनुसन्धानका क्रममा ११ जनालाई पक्राउ गरिएको जिल्ला प्रहरी कार्यालय भोजपुरले जनाएको छ ।
जिल्ला प्रहरी कार्यालय भोजपुरका प्रहरी प्रमुख प्रहरी नायव उपरीक्षक ज्ञानबहादुर खड्काका अनुसार पक्राउ परेका सबैमाथि घटनामा उनीहरूको संलग्नताबारे अनुसन्धान भइरहेको छ । पक्राउ परेकाहरूलाई भदौ १४ गते भोजपुर जिल्ला अदालतमा उपस्थित गराई पाँच दिनको म्याद थप गरिएको छ ।
प्रहरीले घटनाको कारण, कुटपिटमा संलग्न व्यक्तिको भूमिका तथा मृत्युको वास्तविक परिस्थितिबारे थप अनुसन्धान गरिरहेको जनाएको छ । पुरानो विवादका कारण शुरु भएको भनिएको घटनाले हिंसात्मक रूप लिएपछि शिक्षक राईको ज्यान गएको प्रारम्भिक प्रहरी निष्कर्ष छ ।
घटनामा पक्राउ परेकामाथि अनुसन्धान अघि बढेसँगै कुटपिटको कारण, घटनामा प्रयोग भएको भनिएको ढुंगा प्रहारको अवस्था तथा घटनामा संलग्न व्यक्तिको भूमिकासमेत थप स्पष्ट हुने प्रहरीले जनाएको छ ।
शिक्षण पेसामा आबद्ध राईको मेलामा सहभागी हुन पुगेका बेला ज्यान गएको घटनाले स्थानीयस्तरमा समेत चासो बढाएको छ । प्रहरीले घटनाको सम्पूर्ण पक्ष अनुसन्धानपछि मात्रै थप तथ्य सार्वजनिक गरिने जनाएको छ ।