धरानः सामाजिक सञ्जालमा स्टाटस लेखेका पत्रकार तेजन खड्का पक्राउ परेका छन् ।
ब्रेक एण्ड लिंक्स (बिएल) मा कार्यरत मोरङको ऊर्लाबारीका पत्रकार खड्कालाई प्रहरीले पक्राउ गरेको हो । बुधबार उनले ‘मैदान र पार्क छोडौं, रेड लाइट एरिया बनाऊँ, आम्दानी हुन्छ’ भन्दै फेसबुकमा स्टाटस पोष्टयाएका थिए ।
उनको स्ट्याटसमाथि आपत्ति जनाउँदै वडाध्यक्ष उर्मिला थापाले विद्युतीय अपराधसम्बन्धी कसुरअन्तर्गत उजुरी हालेको पाइएको इलाका प्रहरी कार्यालय, उर्लाबारीले जनाएको छ ।
पत्रकार तेजन खड्का एक वडा अध्यक्षको उजुरीका आधारमा साइबर अपराधको आरोपमा पक्राउ परेका हुन् । वडाअध्यक्षले सामाजिक सञ्जाल तथा सञ्चारमाध्यममार्फत आफ्नो चरित्रमा आँच आउने तथा आपत्तिजनक सामग्री सम्प्रेषण गरिएको भन्दै खड्काविरुद्ध उजुरी दिएको बताइएको छ ।
खड्का लामो समयदेखि पत्रकारितामा सक्रिय छन् । नेपाल पत्रकार महासंघ मोरङको सदस्य अभिलेखमा उनको सदस्यता २०७० सालदेखि रहेको देखिन्छ ।