धरानः सुनसरीमा ठूलो परिमाणमा खैरो हिरोइन (ब्राउन सुगर) सहित एकजना पक्राउ परेका छन् ।
पक्राउ पर्नमा बराहक्षेत्र नगरपालिका २ का कालुराम भन्ने ४० वर्षीय कर्णबहादुर राई रहेको जिल्ला प्रहरी कार्यालयका प्रहरी उपरीक्षक दुर्गाराज रेग्मीले जानकारी दिए ।
लागूऔषध नियन्त्रण ब्यूरो शाखा कार्यालय विराटनगरबाट खटिएको प्रहरी टोलीले लागूऔषध ब्राउन सुगर २५.६३० ग्रामसहित पक्राउ गरिएको प्रहरीले जनाएको छ । उनले चलाएको प्रदेश १–०२–०५१प ५९०१ नम्बरको मोटरसाइकलपनि बरामद भएको प्रहरीले जनाएको छ ।
उनी यसअघि पनि तीनपटक लागूऔषध मुद्दामा ३ वर्ष कैद सजाय भुक्तान गरी छुटेको प्रारम्भिक अनुसन्धानबाट खुलेको प्रहरी उपरीक्षक रेग्मीले जानकारी दिए ।

यस्तै, कारागारबाटै ठूलो लागूऔषध सञ्जाल सञ्चालन भइरहेको आशंकामा सशस्त्र प्रहरी बल नेपालले ठूलो परिमाणमा ट्रामाडोलसहित दुई जनालाई पक्राउ गरेको थियो ।
पक्राउ पर्नेमा सुनसरीको धरान उपमहानगरपालिका–१७ घर भई हाल सातदोबाटोमा कोठा भाडामा बस्दै आएका ३४ वर्षीय सुरेन राई र ललितपुर महानगरपालिका–१२ घर भई हाल शंखमुलमा बस्दै आएका ३२ वर्षीय सुजित देउला छन् ।
विशेष सूचनाका आधारमा दिउँसो करिब ३ः३० बजे ललितपुर महानगरपालिका–९ च्यासलमा परिचालित टोलीले एकैदिन १ लाख ६ हजार ५ सय क्याप्सुल ट्रामाडोल बरामद गरेको छ ।