धरानः भदौ १० गते भोटेकोशीमा आएको विनाशकारी बाढीपछि सुनसरकिो बराहक्षेत्र नगरपालिका क्षेत्रका पाँचजना अझैसम्म सम्पर्कविहीन रहेका छन् ।
बराहक्षेत्र नगरपालिका–३ की रुविनाकुमारी धामी, वडा नम्बर ५ का मोहन माझी, वडा नम्बर ७ का भुवन श्रेष्ठ र आशिष उराउ, वडा नम्बर ८ का मोहन माझी तथा वडा नम्बर ११ का मणिकरण राई रहेका छन् । उनीहरू रोजगारी तथा कामको सिलसिलामा त्यहाँमा पुगेका थिए ।
बेपत्ता हुनेमा रुविनाकुमारी कैलाश होटलमा कार्यरत् थिए भने मोहन हाइड्रोपावर सेक्युरिटी सुरक्षा गार्डकाका रुपमा कार्यरत् थिए । भुवन श्रेष्ठ टिमुरे क्षेत्रमा ट्रक चालकका रुपमा कार्यरत् थिए भने आशिष उराउ रसुवा भन्सारमा कार्यरत् रहेको जनाएको छ ।
बेपत्ता व्यक्तिहरूको खोजी कार्य जारी रहेपनि हालसम्म उनीहरूको अवस्था पत्ता लाग्न सकेको छैन । परिवारजनले आफ्ना आफन्तको खोजीलाई तीव्र बनाउन सम्बन्धित निकायसँग आग्रह गरेका छन् । यसैबीच, बेपत्ता व्यक्तिका परिवारलाई राहत उपलब्ध गराउने उद्देश्यले बराहक्षेत्र नगरपालिकाले प्रत्येक परिवारलाई ५० हजार रुपैयाँका दरले खोजी कार्यको लागि आर्थिक सहयोग गर्ने निर्णय गरेको छ । नगरप्रमुख रमेश कार्कीको पहलमा नगर कार्यपालिकाबाट सो निर्णय भएको हो ।