धरानः सुनसरीमा लागूऔषधसहित पक्राउ पर्ने क्रम बढ्दो छ ।
यसैक्रममा सुनसरी देवानगञ्ज गाउँपालिका वडा नं. ७ मा लागूऔषध गाँजा लुकाइछिपाई राखिएको छ भन्ने प्राप्त सूचनाको आधारमा इलाका प्रहरी कार्यालय देवानगंजबाट खटिएको प्रहरी टोलीले रमेश यादवको घर अगाडि रहेको मिल घरमा खानतलासी तथा चेकजाँच गर्दा लागूऔषध गाँजा १.९६ केजी फेला परेको प्रहरीले जनाएको छ ।
गाँजा फेला परेपछि देवानगञ्ज गाउँपालिका वडा नं. ७ बस्ने वर्ष १९ को रामबाबु यादव, भारत अररिया जिल्ला सोनापुर पञ्चायत नं. ६ बस्ने वर्ष १९ को सोनु मेहता, पोसदाहा पञ्चायत नं. ६ बस्ने वर्ष २६ को सुमित संगम मेहता पक्राउ परेका छन् ।
यस्तै, इटहरी उपमहानगरपालिका वडा नं. १६ मित्तेरी टोल स्थितमा इलाका प्रहरी कार्यालय पकलीबाट खटिएको प्रहरी टोलीले वडा नं. १७ बस्ने वर्ष १९ को अबु खानलाई शंका लागि खानतलासी तथा चेकजाँच गर्दा निजको साथबाट लागूऔषध ब्राउन सुगर ०.१९ ग्राम फेला परेको प्रहरीले जनाएको छ ।
यस्तै, इटहरी उप–महानगरपालिका वडा नं. १० डिभिएम बोर्डिङ छेऊबाट लागूऔषधसहित वर्ष १७ को शिवु मण्डल पक्राउ परेका छन् । उनको साथबाट लागूऔषध ब्राउन सुगर ०.३९ ग्राम फेला परेको प्रहरीले जनाएको छ ।
यस्तै, सुनसरीकै इटहरी उपमहानगरपालिका वडा नं. ७ बज्राहा मुसरी टोलमा लागूऔषध बिक्री वितरण भइरहेको छ भन्ने प्राप्त सूचनाको आधारमा प्रहरी टोलीले स्थानीय वर्ष ४६ को दिनेश चौधरीलाई पक्राउ गरेको छ । उनको साथबाट सुगर ०.८७ ग्राम फेला परेको जिल्ला प्रहरी कार्यालय सुनसरीले जनाएको छ ।