धरानः पाँचथरको मिक्लाजुङ गाउँपालिकाबाट आफ्नै बुबाको हत्या आरोपमा आमा र छोरा पक्राउ परेका छन् । मिक्लाजुङ गाउँपालिका–३ का इन्द्रकुमार दमाईको हत्या भएको भन्दै प्रहरीले दुईजनालाई पक्राउ गरेको हो । ४८ वर्षीय दमाई भदौ २० गते छिमेकी भिङ राईको पाखाबारीमा मृत अवस्थामा फेला परेका थिए।
प्रारम्भिक अनुसन्धानबाट आमा–छोरा मिलेर बुबाको हत्या गरेको खुलेपछि मिक्लाजुङ–३ की ४३ वर्षीया महिला र उनका १७ वर्षीय छोरालाई पक्राउ गरिएको जिल्ला प्रहरी कार्यालय पाँचथरका प्रमुख प्रहरी नायब उपरीक्षक (डीएसपी) अनिष कर्णले जानकारी दिए । प्रहरीले उनीहरूको नाम भने सार्वजनिक गरेको छैन । दुवैलाई नियन्त्रणमा लिएर अनुसन्धानका लागि अदालतबाट म्याद थपिएको प्रहरीले जनाएको छ ।
गएको भदौ २० गते छिमेकी इन्द्र राईको पाखाबारीमा मृत अवस्थामा फेला परेका इन्द्रकुमार मृतक दमाईंको घाँटीमा सलको पासो लगाइएको थियो भने निधारलगायत शरीरका विभिन्न भागमा धारिलो वस्तुले प्रहार गरेको जस्तो चोट देखिएको थियो । त्यसपछि प्रहरीले सुक्ष्म अनुसन्धान थालेको थियो ।
अनुसन्धानका क्रममा पक्राउ परेका आमा–छोराले दमाईंलाई आफ्नै घरमा बन्चरो र दाउले प्रहार गरी हत्या गरेको स्वीकार गरेको प्रहरीले जनाएको छ । हत्या गरेपछि शवलाई सुरुमा घरनजिकैको आल्चाको रुखमा झुन्ड्याइएको र पछि त्यहाँबाट करिब पाँच सय मिटर तल भीरपाखामा लगेर फालेको उनीहरूले बयान दिएका छन् । प्रहरीले घटनामा प्रयोग भएको बन्चरोसहित अन्य केही हतियारसमेत बरामद गरेको छ ।