धरानः इलाममा अटो (टेम्पो) दुर्घटना भई आगलागी हुँदा एकजनाको मृत्यु भएको छ भने दुईजना गम्भीर घाइते भएका छन् । यस्तै, तीनजना सामान्य घाइते छन् ।
फाकफोकथुम गाउँपालिका–६ हाङ्मासुलीमा अटो दुर्घटनापछि आगलागी हुँदा ६ जना घाइते भएका थिए । घाइतेमध्ये एकजनाको उपचारका क्रममा मृत्यु भएको प्रहरी निरीक्षक सन्तोषकुमार राईले जानकारी दिए ।
झापाको बिएण्डसी अस्पतालमा उपचारका क्रममा ८ वर्षीया खुशिका श्रेष्ठ भन्ने सुस्मिता श्रेष्ठको मृत्यु भएको प्रहरीले जनाएको छ । शुक्रबार साँझ करिब ५ बजे दुर्घटना भएको र उनलाई अस्पतालले राति ८ः१५ बजे मृत घोषणा गरेको प्रहरीले जनाएको छ । शरीरको विभिन्न भागमा जलेको अवस्थामा उनको उपचार भइरहेको थियो ।
दुर्घटनामा सुस्मिताकी आमा २७ वर्षीया कविता श्रेष्ठ पनि गम्भीर घाइते भएकी छिन् । उनी फाकफोकथुम–६ हाङ्मासुली माइती घर आएकी थिइन् । उनको पनि शरीरको विभिन्न भागमा जलेको अवस्थामा उपचार भइरहेको छ ।
पोखरी–कमेरे भित्री कच्ची सडकखण्डमा मधेश प्रदेश ०३–००३ ह ६९६७ नम्बरको अटो अनियन्त्रित भई सडकबाट करिब दुई मिटर तल खसेको थियो । दुर्घटनापछि अटोबाट पेट्रोल लिकेज भएर आगलागी भएको प्रहरीले जनाएको छ । घटनाको जानकारी पाएपछि इलाका प्रहरी कार्यालय मंगलबारे र प्रहरी चौकी एकतप्पाबाट प्रहरी टोली घटनास्थल पुगेको थियो ।
दुर्घटनामा अटो चालक फाकफोकथुम–६ पोखरी बजारका करिब ३५ वर्षीय लोकबहादुर श्रेष्ठ गम्भीर घाइते छन् । त्यस्तै, देउमाई नगरपालिका–४ मंगलबारे घर भई हाङ्मासुली माइती भएकी २२ वर्षीया दुर्गादेवी श्रेष्ठ सामान्य, हाङ्मासुलीकी २७ वर्षीया मन्दिरा थापा मध्यम तथा झापाको कनकाई नगरपालिका–माईधार घर भई हाङ्मासुली माइती भएकी ४० वर्षीया रमाकुमारी श्रेष्ठ सामान्य घाइते भएकी छन् ।
घाइते सबैको उपचार भइरहेको छ । सामान्य घाइते रमाकुमारी श्रेष्ठ भने उपचारका लागि नबसी माइतीतर्फ गएको प्रहरीले जनाएको छ । घटनाबारे थप अनुसन्धान भइरहेको प्रहरीले जनाएको छ ।
चालकले सडकमा ध्यान केन्द्रित नगर्दा दुर्घटना भएको प्रहरीले जनाएको छ ।