धरानः इटहरीमा मोटरसाइकल दुर्घटनामा दुईजनाको मृत्यु भएको छ ।
जिल्ला प्रहरी कार्यालय सुनसरीका सूचना अधिकारी प्रहरी नायब उपरीक्षक चन्द्रबहादुर खड्काका अनुसार इटहरी–७ बालग्राममा रहेको कल्भर्टको डिभाइजरमा ठोक्किँदा दुईजनाको मृत्यु भएको हो ।
मृत्यु हुनेमा इनरुवा–३ का २९ वर्षीय पारस थापा र इनरुवा–३ कै ३५ वर्षीय सागर रेग्मी रहेको उनले जानकारी दिए । रेग्मी मोटरसाइकल पछाडि सवार थिए ।   इटहरीबाट इनरुवातर्फ जाँदै गरेको प्रदेश १–०२–०४३प५५१४ नम्बरको मोटरसाइकलमा सवार उनीहरूको आइतबार एकाबिहानै आफैं अनियन्त्रित भएर करिब ३ बजे दुर्घटना भएको प्रहरीले जनाएको छ ।
दुर्घटनामा परेर गम्भीर घाइते भएका दुवैजनालाई तत्काल उपचारका लागि धरानस्थित बीपी कोइराला स्वास्थ्य विज्ञान प्रतिष्ठान ल्याइएको थियो । उपचारका क्रममा रेग्मीको ४ः५२ बजेतिर र थापाको बिहान ५ः११ बजेतिर चिकित्सकले मृत घोषणा गरेको जिल्ला प्रहरी कार्यालय सुनसरीले जनाएको छ ।
उनीहरू जिल्ला प्रशासन कार्यालय सुनसरीमा कार्यरत् रहेको खुल्न आएको प्रहरीले जनाएको छ । रेग्मी जिल्ला प्रशासन कार्यालय सुनसरीमा करार सेवामा कार्यरत कर्मचारी थिए । उनी प्रमुख जिल्ला अधिकारी (सिडिओ) का स्वकीयका रूपमा कार्यरत थिए । अर्का मृतक थापा पनि यसअघि जिल्ला प्रशासन कार्यालय सुनसरीमै करारमा कार्यरत रहेपनि केही समयअघि मात्रै राजीनामा दिएको प्रहरीले जनाएको छ । दुर्घटनाबारे थप अनुसन्धान भइरहेको प्रहरीले जनाएको छ ।