धरानः दुर्घटनामा गम्भीर घाइते भएका एक वृद्धलाई अस्पताल पुर्‍याउनुको सट्टा सडकमा छाडेर फरार भएका सिटी सफारी चालक पक्राउ परेका छन्। घाइते अवस्थामा सिटी सफारीमा राखेर अस्पताल लैजाने भन्दै लगेका ८२ वर्षीय तीर्थराज बस्नेतलाई चालकले केही पर सडकमा छाडेको र त्यसको केही समयपछि उनको मृत्यु भएको प्रहरीले जनाएको छ।
आइतबार बिहान विराटनगर महानगरपालिका–९ स्थित ठकुरवाडी रोडमा प्रदेश १–०२–००४ ह ९६७५ नम्बरको सिटी सफारीले विराटनगर–८ निवासी बस्नेतलाई ठक्कर दिएको थियो। दुर्घटनामा गम्भीर घाइते भएका बस्नेतलाई स्थानीयले उद्धार गरी उपचारका लागि सोही सिटी सफारीमा राखेर पठाएका थिए।
तर, अस्पताल पुर्‍याउनुको सट्टा चालकले उनलाई विराटनगर–७ स्थित मालपोत कार्यालयनजिकै सडकमा छाडेर फरार भएको खुलेको छ। प्रहरीले वृद्धलाई सडकमा छाडेपछि चालक सिटी सफारीसहित त्यहाँबाट भागेको जनाएको छ।
मोरङ प्रहरी प्रमुख एसपी कवित कटवालका अनुसार केही समयपछि मालपोत कार्यालयनजिकै वृद्ध मृत अवस्थामा फेला परेका थिए। बिहान करिब ६:३० बजे एक वृद्ध पुरुष सडकमा मृत अवस्थामा रहेको सूचना पाएपछि प्रहरी घटनास्थल पुगेको थियो।
घटनाको अनुसन्धानका लागि जिल्ला प्रहरी कार्यालय मोरङबाट डीएसपी मकेन्द्रकुमार मिश्रको नेतृत्वमा प्रहरी टोली परिचालन गरिएको थियो। सुरुमा मृतकको पहिचान खुल्न सकेको थिएन। पछि विराटनगर–८ का माधव बस्नेतले मृतक आफ्ना बुवा तीर्थराज बस्नेत भएको सनाखत गरेका थिए।
प्रहरीका अनुसार दुर्घटनापछि घाइतेलाई तत्काल अस्पताल पुर्‍याइएको भए उनको ज्यान जोगिन सक्ने सम्भावना थियो। तर, उपचारका लागि अस्पताल लैजानुपर्ने जिम्मेवारी रहेका चालकले घाइतेलाई सडकमा छाडेर भागेको घटनाले मानवीय संवेदनामाथि गम्भीर प्रश्न उठाएको एसपी कटवालले बताए।
घटनालगत्तै प्रहरीले सिटी सफारी र चालकको खोजी थालेको थियो। खोजीका क्रममा बिहान करिब ८:३० बजे मोरङको कटहरी गाउँपालिका–२ स्थित आफ्नै घरबाट ५५ वर्षीय अर्जुन भगत पक्राउ परेका छन्। पक्राउ परेका भगतलाई जिल्ला प्रहरी कार्यालय मोरङमा राखिएको छ।