धरानः तीब्र गतिको मोटरसाइकल दुर्घटनामा परी एकजना महिलाको मृत्यु भएको छ ।
तीब्र गतिमा रहेको मोटरसाइकल अनियन्त्रित भएर दुर्घटना हुुँदा भारतको अररिया थाना पलासी गोठगाउँकी ४० वर्षीय मुना मण्डलको मृत्यु भएको हो । गम्भीर घाइते बनेकी उनलाई तत्कालै रंगेली अस्पताल पुरयाइएको थियो । राति करिब १०ः०५ बजेतिर चिकित्सकले मृत घोषणा गरेको प्रहरीले जनाएको छ ।
मोरङको सुनवर्षी नगरपालिका–८ हर्चनगढबाट डाइनियाबाट सिक्टीतर्फ जाँदै गरेको बीआर ३८ एल ७९२० नम्बरको भारतीय मोटरसाइकल मंगलबार राति करिब ९ः२० बजेतिर हर्चनगढी पुलबाट करिब ८ मिटर तल खसेको थियो ।
दुर्घटनामा मोटरसाइकलमा सवार अर्का एकजना घाइते भएका छन् । मोटरसाइकलको पछाडि सवार सुनवर्षी–८ हर्चनगढीका अन्दाजी ३५ वर्षीय दीपेश मण्डल पनि दुर्घटनामा घाइते भएका छन् । उनको अवस्था सामान्य रहेको र रंगेली अस्पतालमै उपचार भइरहेको प्रहरीले जनाएको छ ।
घटनाको इलाका प्रहरी कार्यालय रंगेलीका इन्स्पेक्टर अशोककुमार झा नेतृत्वको टोलीले थप अनुसन्धान गरिरहेको छ ।
सुनसरीमा प्रहरीसहित पाँचजना घाइते
यस्तै, सुनसरीको दुहबीमा तीब्र गतिको दुई मोटरसाइकल आपसमा ठोक्किँदा दुई प्रहरीसहित पाँचजना घाइते भएका छन् ।
दुहबी नगरपालिका–२ स्थित भित्री सडकखण्डमा मंगलबार राति करिब ९ः३० बजे नेपाल प्रहरी विशेष सुरक्षा गणतर्फ प्रवेश गर्दै गरेको प्रदेश १–०२–०५६ प ४२७६ नम्बरको मोटरसाइकललाई विपरीत दिशाबाट आउँदै गरेको को२७प ९६८६ नम्बरको मोटरसाइकलले ठक्कर दिएको थियो। दुर्घटनामा प्रदेश १–०२–०५६प४२७६ नम्बरको मोटरसाइकल चालक प्रहरी सहायक हवल्दार धीरज चौधरी र पछाडि सवार प्रहरी जवान बाबुराम बुढाथोकी घाइते भएका छन् । चौधरीको बायाँ खुट्टा र टाउकोमा तथा बुढाथोकीको टाउको र देब्रे खुट्टामा चोट लागेको प्रहरीले जनाएको छ । उनीहरूको अवस्था सामान्य छ ।
यस्तै, अर्को मोटरसाइकल चालक श्यामसुन्दर साह तथा पछाडि सवार अरबिन यादव र रामरतन मण्डल पनि घाइते भएका छन् । उनीहरूको अवस्था पनि सामान्य रहेको प्रहरीले जनाएको छ । दुर्घटनामा संलग्न को२७प ९६८६ नम्बरको मोटरसाइकल र चालकलाई प्रहरीले नियन्त्रणमा लिएर इलाका प्रहरी कार्यालय दुहबीमा राखेको छ ।
भाँडोमा डुबेर बालिकाको मृत्यु
मोरङको केराबारी गाउँपालिका–१ तेलेङ पाटीगाउँमा पानी भरिएको भाँडोमा डुबेर २ वर्ष ६ महिना (अढाई वर्ष) की नाबालिकाको मृत्यु भएको छ ।
फडीन्द्र मगरकी छोरी दियाना मगरको मृत्यु भएको प्रहरीले जनाएको छ । प्रहरीका अनुसार मंगलबार दिउँसो करिब २ः३० बजे आफ्नै घरमा खेल्ने क्रममा जाँड पकाउन प्रयोग हुने फोसी (भाँडो) मा भरिएको चिसो पानीमा बालिका डुबेको अवस्थामा उनकी आमा यमुना मगरले फेला पारेकी थिइन् ।
बालिकालाई तत्काल उपचारका लागि धनकुटाको डाँडाबजारस्थित प्राथमिक स्वास्थ्य केन्द्र लगिएको थियो । तर, स्वास्थ्य केन्द्रका चिकित्सकले उनलाई मृत घोषणा गरेका थिए ।
घटनाका बारेमा धनकुटाको प्रहरी चौकी डाँडाबजारले साँझ करिब ६ः१० बजे मोरङ प्रहरीलाई जानकारी दिएको थियो । प्रहरीले घटनाको थप अनुसन्धान गरिरहेको छ ।