धरानः इटहरीमा मोटरसाइकल आफैं अनियन्त्रित भई दुर्घटना हुँदा एकजनाको मृत्यु भएको छ भने एकजना गम्भीर घाइते बनेका छन् ।
पानी परिरहेको समयमा चिप्लिएर सडकको डिभाइडरमा ठक्कर खाई दुर्घटना हुँदा मोटरसाइकल चालक २९ वर्षीय अनिल राईको मृत्यु भएको जिल्ला प्रहरी कार्यालय सुनसरीका डीएसपी चन्द्रबहादुर खड्काले जानकारी दिए ।
बिहीबार साढे ४ बजे इटहरी उपमहानगरपालिका वडा नं. ४ आर्मी क्याम्प छेऊको कोशी लोकमार्गमा उत्तरबाट दक्षिणतर्फ आउँदै गरेको को१९प ३१५० नम्बरको मोटरसाइकल चिप्लिएर अनियन्त्रित भई सडकको डिभाइडरमा ठक्कर खान पुगेको थियो । धनकुटा–२ भीरगाउँ बस्ने राईको टाउको, छाती र मुखमा चोट लागेको थियो ।
उनलाई गम्भीर अवस्थामा सामुदायिक अस्पताल इटहरीमा सामान्य उपचार पश्चात् थप उपचारको लागि विराट मेडिकल कलेज टिचिङ अस्पताल पठाइएको थियो । उपचारका क्रममा साढे ५ बजे उनको मृत्यु भएको प्रहरीले जनाएको छ । मोटरसाइकलको पछाडि बस्ने सन्दीप राई पनि घाइते बनेका छन् । उनको हात खुट्टामा चोट लागेको छ ।